Nënkryetari i Partisë Demokratike, Edmond Spaho, akuzoi sot mazhorancën e drejtuar nga Edi Rama se po përpiqet të kapë të gjitha institucionet, përfshi edhe Gjykatën Kushtetuese, për shkak të nismave anti-Kushtetuese që ka miratuar në Kuvend, me efekt prapaveprues, por edhe paligjshm♪7risë së zhvillimit të zgjedhjeve lokale më 30 qershor.
“Sikurse ju e dini ka një presion të shtuar nga brenda e jashtë vendit që të krijohet Gjykata Kushtetuese, të plotësohen vendet dhe të fillojë funksionimin.
Jemi i vetmi vend në Europë, ndoshta e më tej, i cili funksionon prej më shumë se dy vitesh pa Gjykatë Kushtetuese dhe përgjegjësia për këtë duhet kërkuar tek njerëzit dhe strukturat e ngarkuara për të emëruar vakancat në Gjykatën Kushtetuese dhe mendoj se në radhë të parë duhet kërkuar tek mazhoranca, e cila ka bërë të gjitha përpjekjet që ta mbajë vendin pa Gjykatë Kushtetuese për shkak të interesave okulte që ka pasur.
Janë një mori ligjesh që janë miratuar në kundërshti me përcaktimet kushtetuese. Përshembull mund të përmendim ligjin e teatrit apo atë të dividentit të dy me efekt prapaveprues. Por mos harrojmë dhe legjitimitetin e zgjedhjeve të 30 qershorit. Pra mazhoranca po bën përpjekje për të kapur këtë institucion”, u shpreh Spaho, në studion e emisionit `7pa5` në Vizion Plus.
Ai ka komentuar edhe betejën e fundit të presidentit Ilir Meta duke deklaruar duke thënë, se me qëndrimet që ka mbajtur deri në këto moment ai është i mbështetur mbi përcaktimet në Kushtetutë.
Ndërsa për nismën më të fundit të Presidentit, Spaho është deklaruar pro në parim por sipas tij në kushtet aktuale ligjore kjo është një gjë e vështirë, pasi ligji është bërë në një mënyrë të tillë që do vullnetin e shumicës.
“Referendumi është forma më e lartë e demokracisë në një vend pasi konfirmon vullnetin e qytetarëve. Dhe përsa i përket Kushtetutës këtu kemi praktikë në Shqipëri janë dy referendum të mbajtura, një në vitin 1994, I cili nuk arriti të miratojë Kushtetutën dhe tjetri në vitin 1998 që u zhvillua pa pjesëmarrjen e opozitës.
Pra dua të them që mbajtja e referendumeve është një fryme demokratike. Por në kushtet aktuale ligjore është një gjë e vështirë. Pasi ligji është bërë në një mënyrë të tillë që do vullnetin e mazhorancës”, ka deklaruar Spaho për këtë çështje.
