Ministri i Diasporës, Pandeli Majko, e quajti të paprecedentë thirrjen e presidentit Ilir Meta për shqiptarët që të mblidhen më 8 dhjetor, në ditën e rinisë për një tubim.
I pyetur nga mediat, Majko tha se kreut të shtetit i takon të ulë palët në tavolinë për dialog dhe jo të bëjë mitingje.
“Nuk është koha për tubime, 8 dhjetori i takon një situate të caktuar. Presidentit i duhet të ulë palët në tavolinë dhe jo të bëhet palë. Nuk e kuptoj të dalë presidenti nëpër Shqipëri dhe të bëjë miting. Nuk di të ekzistojë ky precedent në vende të tjera perëndimore ku ne aspirojmë”, tha Majko.
Pas tij reagoi nënkryetari i LSI, Petrit Vasili. Ai tha se Majko nuk i flet dot Ramës, se e di se çfarë i punon Rama.
“Interesant ky Majko, vërtet interesant…!!!
Nuk i flet dot Edi Ramës, minister i të cilit është, se kuptohet që nuk i flet dot… po nuk i flet dot fare, se e di mirë ç’i punon Rama !? Zaten siç ia ka bërë gjithmonë këtij kokëuluri.
Dhe pastaj bën sikur trimërohet, i jep kurajo vetes dhe fillon i jep mend Presidentit për 8 Dhjetorin, kur as ia kërkon njeri dhe as e dëgjon njeri.
Megjithatë ç’rëndësi ka nëse është me Ramën e 2019 apo Ramizin e 1990, rëndësi ka që të rrijë ministër, me apo portofol, kjo e fundit ka rëndësi!
Hajde Pandi në 8 dhjetor, ditë krenarie është. Apo vërtet se harrova… krenaria s’është frak, që u rri të gjithëve…” shkruan Vasili.
