Renditja e KLP në Kuvend/ Kur zgjidhet kryeprokurori i ri…

Kreu i KLP-së, Gent Ibrahimi i ka dërguar Kuvendit shkresën me renditjen e 3 kandidatëve për Prokuror të Përgjithshëm me një mandat 7 vjeçar. Duke qenë se asnjë nga kandidatët nuk bëri ankim lidhur me pikëzimin e tyre në KLP, renditja që mbetet në fuqi është: Olsian Çela me 459 pikë, Arta Marku me 406 pikë dhe Fatjona Memçaj me 362 pikë.

Në garën për kryeprokuror, fillimisht ishin katër kandidat. Por KLP s’kualifikoi nga gara avokatin Lulzim Alushaj.

Më herët, Kryeprokurorja e Përkohshme Arta Marku paralajmëroi ankim për renditjen e KLP në garën për kryeprokurorin e ri, megjithatë apelimi nuk erdhi. Në një kërkesë drejtuar KLP-së të martën, Arta Marku kërkoi që ti vihet në dispozicion “pikëzimi i detajuar prej secilit anëtar të Këshillit të Lartë të Prokurorisë me analizën dhe metodologjinë përkatëse të vlerësimit të ndjekur nga secili anëtar”. Kjo, shpjegohej në kërkesë, me qëllim “që të vlerësoj të drejtën time për të ushtruar ankim kundër vendimit të Këshillit të Lartë të Prokurorisë”.

Procedura – Kushtetuta parashikon që Këshilli i Lartë i Prokurorisë realizon renditjen e tre kandidatëve, nga ai me pikë më shumë, tek ai me më pak. Tre emrat i dërgohen Parlamentit, i cili duhet të zgjedhë brenda 30 ditëve një prej 3 kandidaturave, me një shumicë të cilësuar prej 84 votash.

LEXO EDHE  Mashtroi me ndihmat për tërmetin, pranga burrit nga Tirana

Në rast se nuk arrihet kuorumi, Prokuror i Përgjithshëm zgjidhet kandidati i renditur i pari në listë. Pra, përzgjedhja e Këshillit të Lartë të Prokurorisë mund të jetë vendimtare, në rast se nuk gjendet konsensusi politik në Parlament.