Taulant Balla, kryetar i Grupit Parlamentar të PS-së, ka paralajmëruar Presidentin e Republikës, që të heqë dorë nga tentativat dhe aktet që bllokojnë zbatimin e Reformës në Drejtësi dhe funksionimin normal të organeve kushtetuese ku një prej më të rëndësishmeve është Gjykata Kushtetuese.
Reagimi i Ballës ka ardhur pas deklaratës së Presidentit Ilir Meta, i cili i bëri thirrje qytetarëve që të marrin në dorë fatet e tyre dhe të mbështesin një referendum në mbrojtje të Kushtetutës.
Ndërsa Meta tha se Kuvendi nuk ka numrin kushtetues të deputetëve dhe tha se janë miratuar mbi 20 misma anti-Kushtetuese, Balla theksoi se prioriteti i Shqipërisë për vitin 2020 mbetet fillimi i bisedimeve për anëtarësimin e Shqipërisë në Bashkimin Europian.
“Kuvendi vijon normalisht diskutimin e Buxhetit 2020, ku është parashikuar edhe kostoja shtesë për mbështetjen e institucioneve të krijuara në zbatim të reformës në drejtësi.
Në Rezolutën e miratuar 7 ditë më parë “Kuvendi i Shqipërisë i bën thirrje Presidentit të Republikës të heqë dorë nga tentativat dhe aktet që bllokojnë zbatimin e Reformës në Drejtësi dhe funksionimin normal të organeve kushtetuese ku një prej më të rëndësishmeve është Gjykata Kushtetuese.
Kuvendi i Shqipërisë në mënyrë të përsëritur i bën thirrje Presidentit të Republikës të reflektojë duke kthyer institucionin e Presidentit në kufijtë e kompetencave të njohura nga Kushtetuta dhe të mos ndërrmarrë asnjë veprim tjetër në shkelje flagrante të Kushtetutës”, thuhet në deklaratën e Ballës.
Mazhoranca përmes një Komisioni Hetimor synon shkarkimin e Presidentit nga detyra, ndërsa nisma e Rilindjes ka të bëjë me dekretet e Metës për anullimin e mbajtjes së zgjedhjeve lokale më 30 qershor, duke caktuar një tjetër datë.
