Avokati i njohur Ledio Braho tha se nuk ishte i papritur shkarkimi i Besnik Muçit nga KPA.
Braho tha se sipas ligjit, anëtarit të Kushtetueses i përfundon mandati kur shprehet Gjykata Kushtetuese, e cila sot nuk është funksionale.
Avokati tha se përfundimi i mandatit të Muçit është kompetencë e Kushtetueses dhe përsa kohë ajo nuk është funksionale, atëherë ngërçi mund të zgjasë.
“Jemi në një situatë kaotike, që duket se nuk është krijuar padashje. KED nuk duhej të lejonte që të kandidionin persona që nuk kishin kaluar Vetting në të gjitha shkallët”, tha avokati i njohur.
Braho tha se në kushtet aktuale Muçi mund t’i drejtohet Gjykatës Europiane për të Drejtat e Njeriut, duke shtuar se kandidimi i personave që nuk kishin kaluar Vetting-un duhej të kishin ndërprerë procedurat.
“KED duhej të pezullonte procesin për kandidatët që nuk kishin kaluar Vetting në të gjitha shkallët.
Ka shkelje të ligjit nga Kryetari i KED-së. Jemi në një situatë qesharake kur vendi ka dy vjet pa Gjykatë të Lartë dhe Gjykatë Kushtetuese”, tha avokati Braho. Sipas tij, e gjithë kjo situatë ka ardhur si pasojë e shkeljeve nga KED.
“KED, me detyrim dhe përcaktim donte të ndikonte te Presidenti, ose të ushtronte presion ndaj tij, që të zgjidhte mes dy emrave të tjerë të kandidatëve, përveç Besnik Muçit”, tha Braho. Sipas tij, KED vendosi që Muçi të ishte pjesë e listës dhe renditjen e kandidatëve e ka bërë vetë KED.
“Në Gjykatën Kushtetuese kanë aplikuar mbi 30 persona, por shumë prej tyre ose janë skualifikuar nga KED ose janë tërhequr, për arsye që nuk dihen. Kjo ka çuar në këtë situatë që sot s’ka kandidatë”, tha Braho.
