Në rast nevoje Ilir Meta do të jenë ushtari i parë në mbrojtje të Kushtetutës dhe Republikës.
Është ky reagimi i Tedi Blushit, Zëdhënësit të Presidentit, lidhur me një koment ironik të nënkryetarit të PD-së, Edi Paloka në rrjetet sociale.
Duke komentuar disa deklarata të Rilindjes, Paloka ironizon duke shkruar “pse e zgjat kot Rama shkarkimin e Presidentit?! Nuk e kuptoj çfarë shqetësimi ka Rama për shkarkimin e Presidentit?! Çfarë rëndësie ka çfarë thotë Kushtetuta? Çfarë rëndësie ka se në fund vendos Gjykata Kushtetuese ?”.
Në vijim Paloka shkruan “nuk e kuptoj pse nxjerr një herë Tao Pallën e një herë Spiropallën e çdo palle tjetër të “rilindjes” që përpiqen me deklarata rrumpalle t’ju mbushin mendjen shqiptareve se Rama dhe “rilindja” po luftojnë për drejtësi dhe në mbrojtje të Kushtetutes…?!!!
Shko ore pallë, mblidh ata që i quan deputetë, futi një votim në atë që e quan Parlament, shkarko Presidentin Meta e zgjidh një nga pallat e tu. Eksperiencën e 30 qershorit e ke, prit sa të dali Meta nga zyra, shkallmo derën e zyrës dhe e zgjidh problemin…”, shkruan Paloka.
Por, Blushi në një reagim të tijim shkruan se Parlamenti ka vetëm 82 deputetë legjitimë dhe askush nuk duhet të shikojë ëndërra të tilla sepse të gjithë shqiptarët e dinë se Presidenti Meta kudo që të jetë, në zyrë apo jashtë, do të jetë në krye të detyrës dhe është i bindur se populli shqiptar do t’i përgjigjet çdo thirrjeje dhe dekreti të tij në mbrojtje të Republikës dhe Rendit Kushtetues.
“Lidhur me sugjerimin e z.Paloka që Parlamenti (e përsërisim qartë se ka vetëm 82 deputetë legjitimë, sipas deklaratës së qartë që ka bërë Presidenti Meta në Pogradec në 20 mars 2019), të shkarkojë Presidentin apo sugjerimi tjetër që të pushtojnë Presidencën kur Presidenti Meta të mos jetë në zyrë, u bëjmë të qartë të gjithëve:
Të mos shohin ëndrra të tilla, sepse të gjithë shqiptarët e dinë se Presidenti Meta kudo që të jetë, në zyrë apo jashtë, do të jetë në krye të detyrës dhe është i bindur se populli shqiptar do t’i përgjigjet çdo thirrjeje dhe dekreti të tij në mbrojtje të Republikës dhe Rendit Kushtetues.
Sqarojmë për të gjithë shqiptarët se z.Meta, jo vetëm është plotësisht i ndërgjegjshëm për përgjegjësitë e Tij Kushtetuese, si Kryetar i Shtetit, si Komandant i Përgjithshëm i Forcave të Armatosura dhe Kryetar i Këshillit të Sigurisë Kombëtare, por mbi të gjitha ai është dhe do të jetë në rast nevoje ushtari i parë në mbrojtje të Republikës dhe Kushtetutës”, shkruan Blushi.
