Katër shqiptarë dhe një grek janë arrestuar në Korinth të Greqisë si pjesë të një bande kriminale që merrej me trafikimin e drogës. Identitetet e shqiptarëve ende nuk bëhen me dije por mësohet se në cilësinë e provës materiale, janë sekuestruar 560 kg hashash, 4619 euro, tre automjete dhe 9 aparate celularë. Raportohet se shqiptarët ishin prej muajsh nën hetim nga policia fqinje.
Shqiptarët të moshave 29, 35, 36 dhe 37 vjeç, dhe greku 16-vjeçar u arrestuan në zona të ndryshme të Atikës dhe në Korinth.
Mediat greke shkruajnë se 36-vjeçari shqiptar luante rolin kryesor në organizatë, për të cilin policia thotë se ishte i ngarkuar për gjetjen e drogës si dhe për transportimin dhe furnizimin e trafikantëve nga Atika dhe Korinthi.
Anëtarët e tjerë të grupit ishin përgjegjës për ruajtjen, standardizimin dhe trajtimin e sasive të kanabisit të papërpunuar, ndërsa në banesën e të miturit fshihej lënda narkotike.
Pas kontrolleve në automjetin e 36 vjeçarit dhe në një shtëpi në Korintin e Vjetër, u gjetën dhe u konfiskuan përkatësisht 560 kg dhe 620g kanabis, 4,610 euro, 3 vetura dhe 9 telefona celular.
Policia vlerëson se fitimi i pritshëm nga shitja e drogave të sekuestruara arrin në më shumë se 840,000 eurove. Të arrestuarit u dërguan te Prokurori i Qarkut në Korinth.
