Liridon Pula, i arrestuar për shpërdorim detyre, po që u la i lirë pas vendimit të Gjykatës së Apelit, është shkarkuar nga detyra e Drejtorit të Kadastrës së Durrësit.
Në vend të tij është emëruar Artur Çobani, i cili ka mbajtur pozicionin e shefit tekniko-ligjor, në Drejtorinë e Përgjithshme të Kadastrës. Gjithashtu, Çobani ishte i komanduar si drejtor në Kavajë, para shkrirjes së drejtorive të Aluiznit dhe Hipotekës.
Arrestimi i Pulës u bë pas urdhërit të Prokurorit Arjan Ndoj, i cili u vu nën akuzat e forta të Kryeministrit Edi Rama dhe nënkryeministrit Erion Braçe. Madje ky i fundit nuk nguroi të shkonte në seancën gjyqësore të vlerësimit të masës së sigurisë ndaj Pulajt, veprim ky që u interpretua dhe u cilësua si një presion i hapur i Qeverisë ndaj gjykatës.
Pula fitoi lirinë në Apel, pak ditë më pas vendimit të shkallës së Parë, që e cilësoi të lidhshme arrestimin e ish-drejtorit të Kadastrës.
Gjyqtarja Valbona Çekrezi ka rrëzuar vendimin e shkallës së parë që kishte caktuar masën “arrest me burg”, duke vendosur “detyrim paraqitje” ndaj ish-zyrtarit.
