Nga Boldnews.al
Anëtari i Gjykatës së Lartë, Ardian Dvorani, do të vijojë të jetë në krye të Këshillit të Emërimeve në Drejtësi, pavarësisht se Presidenti Ilir Meta pritet të dorëzojë ndaj tij një kallëzim penal për “shpërdorim detyre” dhe “përvetësim të titullit a detyrës shtetërore”, pikërisht për shkeljet e supozuara në krye të KED-së.
Dvorani, anëtari i vetëm në detyrë i Gjykatës së Lartë, pritet të zgjidhet automatikisht anëtar i Këshillit të Emërimeve në Drejtësi për vitin 2020, për shkak se nuk ka rivalë.
Këshilli i Emërimeve në Drejtësi është një strukturë që ngrihet një herë në vit dhe anëtarët e tij shortohen nga magjistratët që plotësojnë kriteret formale në Gjykatën Kushtetuese, Gjykatën e Lartë, Prokurorinë e Përgjithshme, në gjykatat e prokuroritë e Apelit, si edhe në gjykatat administrative.
Kushtetuta parashikon se anëtari i shortuar nga Gjykata e Lartë është njëkohësisht edhe kryetar i Këshillit të Emërimeve në Drejtësi.
Këshilli i Lartë Gjyqësor (KLGJ) ka miratuar së fundmi listën e gjyqtarëve që plotësojnë kriteret për të qenë pjesë e shortit për anëtar të Këshillit të Emërimeve në Drejtësi.
Në krye të listës qëndron emri i Ardian Dvoranit, si anëtari i vetëm në detyrë i Gjykatës së Lartë.
Si rrjedhojë, Dvorani, i cili emërohet automatikisht si anëtar i KED-së për vitin e ardhshëm, do të jetë njëkohësisht edhe kryetar i tij, siç ka qenë deri më tani.
Qëndrimi i tij në detyrën e kryetarit të Këshillit të Emërimeve në Drejtësi pritet t’i thellojë më tepër konfliktin ndër-institucional me Presidentin e Republikës.
Këshilli i Emërimeve në Drejtësi i vitit 2020 pritet të shqyrtojë aplikimet për 5 vakanca për në Gjykatën Kushtetuese, një prej të cilave i takon Presidentit, një Kuvendit dhe tre të tjera Gjykatës së Lartë (kur të nisi funksionin kjo e fundit).
Presidenti Meta dhe kryetari i KED-së, Ardian Dvorani, u përfshinë gjatë javës së kaluar në një shkëmbim të ashpër akuzash dhe kundër-akuzash.
Meta e akuzon Dvoranin se, në cilësinë e kryetarit të Këshillit të Emërimeve në Drejtësi, ka uzurpuar në shkelje të Kushtetutës dhe ligjit kompetencat e Presidentit për emërimin e një anëtari të Gjykatës Kushtetuese. Për këtë arsye, Meta ka vendosur t’i drejtohet Prokurorisë për nisjen e hetimit penal ndaj Dvoranit.
Kryetari i KED-së, Dvorani, nga ana e tij, iu kundërpërgjigj në mënyrë ironike, duke deklaruar se “do të përballet me ligjin, duke mos iu shmangur procesit me argumenta proceduriale”.
Ky qëndrim i Dvoranit duket se risjell në vëmendje procesin gjyqësor të zhvilluar ndaj Metës në vitet 2011-2012, kur presidenti i sotëm, në atë kohë zv.kryeministër, u akuzua për “Korrupsion aktiv të zyrtarëve të lartë”.
Është disi e paqartë ky qëndrim i Dvoranit, pasi, sipas të dhënave arkivore, rezulton se Meta nuk i është shmangur me procedurë hetimit dhe gjykimit të tij. Ai rezulton të jetë zyrtari më i lartë shqiptar i gjykuar për korrupsion. Në përfundim të procesit, trupa gjykuese e Gjykatës së Lartë, e drejtuar nga Ardian Dvorani, vendosi 5-0 në favor të pafajësisë së Ilir Metës.
