Leonardo Bonucci nuk beson që Italia është në të njëjtin nivel si Spanja, Franca Gjermania apo Anglia, por mbrojtësi ndjen se mund të arrijnë në ato nivele.
Pavarësisht se kombëtarja italiane fitoi 10 ndeshje radhazi në kualifikueset e Europianit, ku në ndeshjen e fundit mundi Bosnje Hercegovinën me rezultatin 3-0, Bonucci në konferencë për shtyp para ndeshjes me Armeninë tha:
“Ne do të jemi mes elitës së futbollit kur të provojmë se mund të përballojmë dhe rivalizojmë me ato ekipe të cilat kanë bërë diferencën vitet e fundit në arenën botërore”.
“Kur krahasohemi me skuadra të tilla si Spanja, Franca, Gjermania, ne na mungojnë disa gjëra, duke përfshirë dhe eksperiencën. Ata kanë shumë lojtarë yje, gjë që i mungon kombëtares tonë”.
“Sa më shumë të luash kundra ekipeve me intensitet, cilësi, aq më shumë përmirësohesh”, – përfundoi mbrojtësi i Juventusit.
