Partia Demokratike dhe aleatët e saj i janë përgjigjur pozitivisht ftesës së Presidentit të Republikës Ilir Meta për një takim lidhur me krizën politike që po kalon vendi.
Burime zyrtare nga Partia Demokratike konfirmojnë për ABC NEWS se takimi është fiksuar të mbahet ditën e hënë, ndërkohë që kabinetet janë duke dakordësuar orën e takimit.
Opozita pritet të ketë një ditë të ngjeshur pune këtë të hënë kur në axhendë të takimeve është parashikuar edhe një mbledhje në selinë blu me përfaqsues të OSBE-së për reformën zgjedhore.
Gjithashtu nesër, Presidenti, ashtu siç ka paralajmëruar, do të padisë kreun e Këshillit të Emërimeve në Drejtësi, Ardian Dvorani për të cilin ka pohuar se ka fakte tronditëse për tentativa të kapjes së Gjykatës Kushtetuetse.
Gjatë javës, Presidenti Meta ka paralajmëruar takime me shoqërinë civile, përfshirë fondacionin Soros.
Burimet bënë me dije gjithashtu se Meta pritet të ftojë për takim edhe Këshillin e Ambasadorëve Shqiptarë për ti informuar për situatën e rëndë të funksionimit të shtetit ligjor që rrezikon izolimin e vendit.
