Ish-ministri i Drejtësisë, Ylli Manjani, përmes një postimi në rrjet shkruan se si kërcënimi i Edi Ramës se do të shkarkojë Ilir Metën si President, ashtu edhe kërcënimi i këtij të fundit, se do të shpërndajë Parlamentin, janë tërësisht jashtë hapësirës Kushtetuese.
Manjani shkruan se Kushtetuta parashikon se Parlamenti shpërndahet ose kur nuk miraton buxhetin, ose kur nuk zgjedh dot Kryeministrin.
Ndërkohë, lidhur me shkarkimin e Presidentit, Manjani kujton raportin e Komisionit të Venecias.
“Cilido që do të ndërmerrte një hap të tillë ekstrem, pra të përdorte autoritetin formal për të goditur tjetrin, do sillte pasoja shumë shumë të rënda për vendin.
Në një përplasje të tillë, ku çdo mjet nuk përjashtohet, fiton më i forti por humbet Shqipëria”, shkruan Manjani.
Postimi nga Ylli Manjani
Si kërcënimi i Parlamentit (Edi Ramës) që do shkarkojë Presidentin, ashtu edhe kërcënimi i Presidentit (Ilir Metes) se do shpërndajë Parlamentin janë tërësisht jashtë hapësirës Kushtetuese të Republikës.
Siç e kemi stërspjeguar, madje edhe të konfirmuar nga Komisioni i Venecias, procedura e shkarkimit të Presidentit është jo Kushtetuese.
Nga ana tjetër, Kushtetuta parasheh se shpërndarja e Parlamentit bëhet vetëm kur ky i fundit dështon të zgjedhë Kryeministrin ose kur nuk arrin të miratojë buxhetin.
Asnjëri nuk legjitimohet të bëjë atë që kërcënon se do ta bëjë!
Cilido që do të ndërmerrte një hap të tillë ekstrem, pra të përdorte autoritetin formal për të goditur tjetrin, do sillte pasoja shumë shumë të rënda për vendin.
Në një përplasje të tillë, ku çdo mjet nuk përjashtohet, fiton më i forti por humbet Shqipëria.
Ndaj nuk dua as ta mendoj këtë skenar. Nuk ja ka borxh ky vend askujt as një ’97 tjetër, por as një Enver Hoxhë të ri…
DENONCO