Ambasadori italian, Alberto Cutillo, i ka sugjeruar palëve që t’i drejtohen Venecias lidhur me situatën e krijuar për Gjykatën Kushtetuese.
Reagimi i diplomatit italian vjen në një kohë, kur Presidenti ka dekretuar Marsida Xhaferllarin si anëtare të Kushtetueses, ndërsa KED dhe Kuvendi njohin, Arta Vorpsin, si anëtare, me pretendimin se Kreut të Shtetit i mbaruan afatet kohore dhe ajo renditej e para në listën e kandidatëve.
“Palët janë ende shumë larg. Kam një sugjërim personal, palët të shkojnë për interpretim në Venecia, i cili do ishte profesional dhe mbi palët,” tha diplomati italian.
Ai shtoi se e rëndësishme është që Gjykata Kushtetuese të funksionojë.
Kuvendi ka miratuar me 97 pro, 0 kundër dhe 4 abstenime rezolutën e PS-së për shmangien e krizës institucionale kushtetuese për legjitimitetin e Gjykatës Kushtetuese.
Seanca e jashtëzakonshme erdhi pas dekretit të presidentit Ilir Meta për emërimin e Marsida Xhaferllarit në të njëjtin vend të zënë më parë nga gjykatësja Arta Vorpsi.
