Nga Boldnews.al
Kryeministri Edi Rama ka zgjedhur të dhurojë shfaqjen e rradhës nga godina e Kryeministrisë, ndërsa në “Unazën e Re” gjenerali-ministër Sandër Lleshaj eksperimentoi gazin toksik, shkopinjtë e gomës dhe terrorin ndaj një grupi qytetarësh të pambrojtur.
Me mjekrën që po i zgjatet, të ngjashme me atë të Sadam Hysein, Rama kishte mbledhur në Kryeministri disa qytetarë, nga ata që kanë zgjidhur hallet përmes platformave, për të treguar se Ai është në krye të detyrës, zgjidh probleme dhe është në krye të punëve.
Paralelisht me shoë e Ramës, fadromat e IKMT, banda e Lleshajt dhe e Veliajt, terrorizonte, dhunonte dhe shkatërronte banorë e banesa.
Rama sot shfaqi dy fytyrat e një koke: atë të dhunuesit, që s’njeh normë e moral, dhe atë të cinikut, duke u tallur me qindra fatkeqë, që sot provuan mbi kurriz gjenocidin.
Reformatori, siç i pëlqen të vetë-quhet apo t’a quajnë, u shfaq si një diktator frikacak, i ngjashëm në sjellje me Ramizin, dhe në pamje me Sadamin.
Dhe këtë me apo pa dëshirë, i vetëdijshëm ose jo, e bëri për të tërhequr vëmendjen, dhe ndoshta edhe për t’u shfajësuar.
Ai është njeriu që bën batuta, që qesh, që zgjidh halle e probleme, që pranon mesazhe në telefon e rrjete sociale, ndërsa Lleshaj, i ngjashëm në pamje me Hekuranin dhe në sjellje me Gramozin, urdhëronte dordomuzët për të “edukuar” pak rebelët e Unazës.
Fatkeqësisht, të dy janë komodë, bashkë me “dordomuzët” që të veshur me uniformën e shtetit, dhunonin ata, keqbërësit 70 apo 80 vjeçarë, që mbronin banesat e tyre.
Rama u shfaq në rrjetet sociale dhe në TV, Lleshaj u shfaq me grupin e gatshëm të bandës policore, Veliaj me fadromat. U shfaqën si dikur të ngjashmit e tyre që mbronin bustet, ndërsa dikur kishin përballë turma me shpirt e zemër, sot kishin përballë një grusht njerëzish të lënë në mëshirën e bandës.
Po opozita?
Opozita nuk u shfaq, ose më saktë individë brenda saj, zgjodhën të shkojnë në zonë, të bëjnë deklarata e premtime, të akuzojnë Ramën për banditizmin që po e provonin në kurriz banorët e Unazës, dhe në fund të shfaqeshin në spitalin e Traumës, aty ku si rezultat i dhunës policore gjeje edhe 69, 74 apo 80 vjeçarë.
Dhe më e keqja ishte që askush nuk artikuloi qoftë edhe një fjali, ndaj Ramës, Lleshaj, Veliut e Veliajt se një ditë do të përballeshin me ligjin, qoftë edhe për t’i trembur, në mos për t’i frenuar.
Ndaj dhe Rama sot me pamjen e Sadamit, u shfaq i qetë, i qeshur, i veshur me kostum dhe i kollarisur.
