Në Ohër të Maqedonisë së Veriut është mbajtur takimi i dytë brenda pak javësh i nismës mbi “mini-Shengenin Ballkanik”, ndërsa takimi i tretë do të mbahet më 21 dhjetor në Durrës.
Kryeministri maqedonas Zoran Zaev, ai shqiptar Edi Rama dhe Presidenti serb Aleksandar Vuçiç, deklaruan në konferencën e përbashkët se arritën marrëveshje për ‘Shengenin e vogël’, përkatësisht pajtimi për masa konkrete që të kontribuojnë zhvillimin dhe rritjen ekonomike për vendet e Ballkanit Perëndimor.
Në konferencë u theksuar se kjo nismë është e hapur për gjithë rajonin. Rama mbajti një qëndrim kritik ndaj liderëve të Kosovës, për të cilët tha se janë vetë-izoluar dhe vetë-përjashtuar nga kjo nismë, por shtoi se në takimin e rradhës janë të ftuar të gjithë.
Referuar deklaratave, masat e kësaj marrëveshjeje janë:
Udhëtimet e shtetasve të Serbisë, Maqedonisë së Veriut dhe Shqipërisë në këto vende të mundësohet me letërnjoftim
Mundësohet që të huaj të mund të udhëtojnë në vend pa viza shtesë dhe kjo do të rrisë numrin e turistëve të huaj dhe do të vendosë oferta dhe destinacione të përbashkëta turistike.
Leje të përbashkëta pune dhe pranimi i diplomave, pa procedura shtesë.
