Prokuroria mbyll hetimet për lobimin, shpall të akuzuar liderin e PD (DETAJE)

Lulzim Basha është zyrtarisht i akuzuar për çështjen e famshme të lobimit në SHBA që nisi si akuzë politike nga PS dhe përfundoi si akuzë penale në gjykatë.

Është publikuar sot një shkresë nga prokuroria, ku thuhet se Basha është njoftuar nga organi i akuzës për mbylljen e hetimeve ndaj tij dhe ndaj dy zyrtarëve të tjerë të PD-së.

Në këtë shkresë thuhet se “Basha, Arben Ristani dhe Ilir Dervishi njoftohet nga prokurorët Gjergji Tako dhe Ervin Karanxha se kanë përmbyllur fazën hetimore dhe ndaj tyre rëndojnë akuzat për falsifikim të vulave dhe stampave përfshi atë të pastrimit të produkteve të veprës penale ose veprimtarisë kriminale”.

Reagimi i Bashës në qershor kur u njoftua për hetimet:

LEXO EDHE  Furgoni përplas për vdekje 65-vjeçaren në Krujë (DETAJE)

“Ai (Rama) me metoda putiniane, ka vendosur të hapë hetime kundër meje, me akuza qesharake, të sajuara keq nga prokuroria e tij politike. Edi Rama ka një vit e gjysëm që mban si shpatë në dorë një hetim absurd, pa prova dhe pa asnjë fakt kundër Partisë Demokratike.

Tani që është në dëshpërim për të larguar vëmendjen nga kriza politike dhe skandalet për bashkëpunimin me krimin për të vjedhur zgjedhjet, Edi Rama ka vendosur që të sajojë akuza absurde për të shpërqendruar publikun. Rama ka menduar se do të më trembë mua apo do të stepë opozitën, por do ta kuptojë shpejt se unë as nuk trembem dhe as nuk tërhiqem!”