Nëntë shqiptarë kanë përfunduar në prangat e policisë spanjolle pasi në bashkëpunim me njëri-tjetrin dërgonin klandestinë nga Spanja drejt Anglisë. Identitetet e të arrestuarve ende nuk bëhen të ditur, por mësohet se policia ka zbardhur detaje të reja nga ky operacion.
Kur nisën hetimet për këtë grup?
Sipas raportimeve nga mediat spanjolle, hetimet mbi grupin që trafikonte klandestinë nisën në vitin 2018, kohë kur autoritetet spanjolle vunë re një shtim të numrit të emigrantëve që synonin të kalonin nga Spanja drejt Mbretërisë së Bashkuar.
Policia fillimisht dyshoi se kishte një sindikatë të krimit të organizuar pas rritjes së madhe të emigrantëve, kryesisht nga Shqipëria, që përdornin Spanjën si një vend tranzit për të arritur më pas në Angli.
Hetimet e agjentëve zbuluan se organizata ishte e përbërë nga dy qeliza, njëra që vepronte në Bilbao-Barakaldo-Sestao dhe tjetra që vepronte në provincat e tjera për të siguruar migrantët, qoftë nga Shqipëria ose përmes kontakteve me ndërmjetësit që jetonin në kampe afër portit të Santurcës.
