Nga Boldnews.al
Mediat pranë kryeministrit tonë nxorrën lajme me shumicë, sipas tyre shumë të “rëndësishme” nga vizita e Ramës në Greqi, ku më kryesorja ishte se homologu grek Mitsotakis e kishte komplimentuar Ramën për kollaren e veçantë, me sfond kafe dhe topa të bardhë. Ai kompliment për kollaren po merr konotacion pezhorativ, sepse pas saj fshihet ndarja e detit dhe rreziku i madh që Shqipëria të humbë pjesë të rëndësishme nga hapësira detare.
Me firmë të Edi Ramës është ndryshuar menjëherë përbërja e grupit negociator të marrëveshjes së detit me shtetin fqinj. Me vendim të Këshillit të Ministrave, grupi i ngritur në kohën kur ministër i Jashtëm ishte Ditmir Bushati është reduktuar dhe tanimë do të përbëhet nga 7 zvministra dhe me kryetar një prej zv,ministrave të Jashtëm, që me gjasë do të jetë “eruditi i madh” dhe burri i “pjekur” Gent Cakaj.
Një nga zëvendësministrat e jashtëm, të brendshëm, të mbrojtjes, energjitikës, bujqësisë, mjedisit dhe ekonomisë do të jetë pjesë e komisionit të ri, i cili tashmë e në vijim drejtojnë bisedimet me palën greke për çështjen e ndarjes së detit. Kjo lëvizje e kryeministrit Edi Rama vjen vetëm pak orë pasi u kthye nga vizita zyrtare në Athinë.
Largimi i negociatorëve të mëparshëm, të cilët kryesoheshin nga ish-ministri i Europës dhe Punët e Jashtme Ditmir Bushati sot nuk eksitojnë më. Pikërisht ky ndryshim po shton zërat se po gatuhet një marrëveshje e shpejtë, duke rrezikuar seriozisht që vendi ynë të humbasë hapësirë të konsiderueshme detare.
Komisioni i mëparshëm përbëhej nga ekspertë të fushave të ndryshme, diplomatë, specialistë të pavaruar, ekspertë të së drejtës ndërkombëtare dhe përfaqësues nga radhët e ushtrisë. Për të marrë miratimin e kreut të shtetit, edhe presidenti dërgoi përfaqësuesin e tij. Tashmë gjithçka është përbysur.
Negociatat për ndarjen e detit do të drejtohen nga të gjithë të përzgjedhurit e kryeministrit. Në ligj është e përcaktaur se zëvendëministrat emërohen dhe shkarkohen nga kryeministri. Në këtë rast, ai ka vënë në “ballë të negociatave” mjaft të vështira vejzërinë dhe djelmoshat nënministra…
Një vendim i marrë me shumë nxitim, për më tepër vetëm pak orë pas vizitës në Athinë ka mbushur me hije të madhe misteri nismën e kreut të qeverisë sonë. Aktualisht vendi është pa Gjykatë Kushtetuese dhe kreu i shtetit nuk është shprehur për “certifikimin” e grupit negociator. Në çdo rast, një marrëveshje e mundshme për ndarjen e detit edhe pse mund të kalojë me urdhër Ramist në Parlamentin e kontrolluar prej tij, duhet të përfundojë patjetër në Gjykatën Kushtetuese, pasi çdo subjekt politik në opozitë, por edhe nga shoqëria civile, mund ta ankimojnë marrëvshjen në gjykatë, duke e gjykuar si antikushtetues.
Nxitimi i Ramës për të mbyllur “disa llogari” me çështjen e detit, sot po konsiderohet një rrezik serioz, ku mund të fshihen afera të cilat dëmtojnë interesat kombëtare. Komisioni edhe pse përbëhet nga shtatë anëtarë ka një emërues të përbashkët: ata janë syri dhe mendja e kryeministrit, duke pranuar çdo urdhër të dalë prej tij.
Loja e rrezikshme që sapo ka nisur të shfaqet mund të mbyllet me konflikte që kreu i qeverisë në ditët e fundit politike mund ti lërë vendit një barrë të madhe. Edhe pse komisioni i parë punoi gjatë dhe vendosi disa piketa, nuk u arrit marrëveshja përfundimtare për shumë arsye, ku më kryesorja ishte se mungonte guximi për të hedhur firmën mbi një draft i cili peshon shumë. Sot Rama do e “zgjidhë” me zëvëndëministrat ministrat e tij.
