Përfaqësuesja e Lartë të Bashkimit Evropian për Politikën e Jashtme dhe Çështjet e Sigurisë, Federica Mogherini mblodhi në mbrëmjen e sotme në një darkë liderët e Ballkanit Perëndimor. Më 1 dhjetor përfundon mandati i saj, e ky është takimi i fundit i zyrtares me liderët e Ballkanit.
Raportohet se gjatë takimit u shpreh keqardhje për vendimin e Këshillit Evropian, për të mos hapur negociatat e pranimit me Maqedoninë e Veriut dhe Shqipërinë, ndërkohë që palët ranë dakord që integrimi i Ballkanit Perëndimor në BE të mbetet një objektiv kryesor strategjik.
Krerët e shteteve u zotuan se do të vazhdojnë që të angazhohen për perspektivën evropiane, reformat, si dhe bashkëpunimin rajonal dhe marrëdhëniet e fqinjësisë së mirë.
Zëdhënësja e BE-së, Maja Kocijançiç postoi një fotografi ku shfaqet Mogherini me liderët e Ballkanit, por aty mungon vetëm kryeministri i Shqipërisë, Edi Rama.
