Është zbardhur sot vendimi me 140 faqe i Gjykatës së Krimeve të Rënda për ish-ministrin e Brendshëm Saimir Tahiri, i cili iu shpëtoi akuzave të rënda ndaj tij në sajë të punës së dobët të prokurorisë.
Pavarësisht se Gjykata deklaron se ekzistonin telefonata të njerëzve të ngushtë të Tahirit me grupin Habilaj, asnjë prej tyre nuk ka qenë pjesë e përgjimeve të Prokurorisë.
Por le të ndalemi te arsyetimi i Gjykatës se pse Tahiri nuk do të kalojë asnjë ditë burg, dhe dënimi prej 3.4 vitesh do të konverohet në shërbim prove, në ndryshim nga vartësi i tij Jaeld Çela.
Tahiri është avantazhuar për shkak se nuk i është shmangur hetimeve, për shkak se nuk përbën rrezikshmëri të lartë, dhe prej angazhimeve të tij familjare, duke qenë se ka dy fëmijë të mitur, që kanë nevojë edhe për përkujdesjen e tij.
“I pandehuri ka në ngarkim fëmijë të mitur në moshë të vogël dhe sjellja e tij pas kryerjes së veprës penale rezulton që të ketë qenë e mirë, pasi nuk ka kryer asnjë vepër tjetër penale. Ka qenë korrekt dhe i është përgjigjur thirrjeve të organit të akuzës në periudhën e hetimit”, thuhet mes të tjerave në arsyetimin e Gjykatës.
