Situata problematike në bujqësi kryesisht në zonën e Myzeqesë ka detyruar fermerët të dalin në protesta të vazhdueshme. Ata kanë paralajmëruar sërish protestë të organizuar këtë radhë më të zgjeruar dhe qëllimi i saj është sensibilizimi i qeverisë në lidhje me situatën e vështirë që po kalojnë blegtorët dhe fermerët e kësaj zone.
Protesta vjen pas heshtjes së qeverisë.
Sipas Shoqatës së fermerëve të Myzeqesë të mërkurën në 30 tetor ora 11:00, ata do të manifestojnë tek rrethrrotullimi i Savrës ku do të parashtrojnë edhe 5 kërkesa për qeverinë, për të cilën thonë se i ka lënë në heshtje.
Ata kërkojnë mbështetje financiare, vlerësim dhe kompensim për produktet e humbura. Rregullim në paketën fiskale, kërkojnë të ndihmohen nga specialistë të bujqësisë si dhe rregullimin me ligj të tregtisë dhe mënyrës së saj.
Fermerët duket se e kanë intensifikuar shkallën e protestës.
Njoftimi
Njoftojmë fermerët e Myzeqesë se grupi nismëtarë i krijimit të Shoqatës organizon me datë 30.10.2019 ditë e Merkurë ora 11:00 në rrugën nga Rrotondo e Savrës deri tek Rrotondo e Plasmasit në Lushnjë një Tubim paqësor.
Ky manifestim bëhet për të sensibilizuar Qeverinë dhe Opinionin Publik në lidhje me situatën e vështirë që po kalojnë fermerët dhe blektoret e Myzeqesë si rezultat i çrregullimit të tregut. Ne këtë tubim do të parashtrohen sërish 5 (pesë) kërkesat tona për Qeverine e cila nuk ka patur asnjë reagim zyrtar ne lidhje me këto kërkesa . Ne vlerësojmë se kjo situatë është rezultat i politikave te gabuara te qeverive ne fushen e bujqësisë. Për të ndryshuar situatën kërkojmë:
1-) Mbështetje financiare direkte për fermerët duke na subvencionuar për cdo njësi produkti te hedhur ne treg kundrejt faturës tatimore të shitjes dhe stimulim te eksportuesve te cilet jane promotore te zhvillimit te bujqësisë.
2-) Vlerësim dhe kompesim financiar me cmim dysheme të tregut për produktet e humbura nga fatkeqsitë natyrore dhe stogun e produktit të shkaktuar nga crregullime të forta të tregut.
3-) Rregullim në paketen fiskale 2020 të shkallës së TVSH-së për sektorin e tregëtimit dhe përpunimit të produkteve bujqësore e blektorale sepse aplikimi i shkallëve të ndryshme të TVSH-së që sot është në mënyre paradoksale 0% në blerje dhe 20% në shitje dhe perfshirja e të ashtuquajturës normë kompesimi 6% në këtë mekanizëm i ka vënë operatorët e këtij sektori në një regjim taksimi të padrejtë dhe për pasojë i ka detyruar të furnizohen me produktet bujqësore nga importi dhe të braktisin produktin vëndas .
4-) Kërkojme nga Ministria e Bujqësisë të na garantojë shërbimin e ekstensionit me specialistët e Drejtorive Rajonale të Bujqësisë,laborator për analiza të tokës, garantim dhe monitorim të cilësisë së imputeve bujqësore , kontroll dhe monitorim të cilesisë së produkteve tona nëpërmjet një laboratori të akredituar.
5-) Kërkojmë nga qeveria të angazhohet në rregullimin me ligj të kushteve dhe mënyren e kryerjes së tregtisë me produktet bujqësore për të garantuar interesat e paleve në këtë treg.
Pjesmarrja sa me e madhe në tubim rrit shanset për realizimin e ketyre kërkesave.
Grupi nismëtar i themelimit te Shoqatës!
