Parlamenti Europian miratoi sot një rezolutë përmes së cilës mbështet hapjen e negociatave për Shqipërinë dhe Maqedoninë e Veriut me BE-në.
Rezoluta e PE-së vjen 6 ditë pasi Këshilli Europian nuk arriti një marrëveshje për hapjen e negociatave për dy vendet e Rajonit, ndërsa duket se Shqipëria penalizoi edhe Maqedoninë e Veriut. Kjo e fundit ishte shumë pranë negociatave, por qëndrimi i Francës bllokoi hapjen për të dy vendet, duke mos lejuar në këtë mënyrë një ecje përpara të Maqedonisë së Veriut.
Vendimi i PE-së është interpretuar me nota optimiste nga përfaqësues të Rilindjes, veçanërisht nga Taulant Balla që dha njoftimin në rrjet mbi miratimin e rezolutës.
Në anën tjetër në rrjetet sociale, që mbajnë profilin e Kryeministrit Edi Rama, qarkullojnë njoftime sipas të cilave, negociatat për Shqipërinë dhe Maqedoninë do të hapen në dhjetor.
Këshilli Europian në përfundimet e tij bëri të ditur se çështja e zgjerimit do të diskutohet në maj të 2020.
