Është ndarë nga jeta Natasha Këlliçi, (Dulaku), ish-redaktore letrare në Shtëpinë Botuese “Naim Frashëri” dhe ish-gazetare e njohur e Radio Tiranës. Këlliçi u shqua për redaktimin e veprave të disa prej shkrimtareve tanë më të shquar, ndër të cilët- Skënder Drini, Dhimitër Xhuvani, Teodor Laço, Kiço Blushi.
Më 1992 Natasha nisi të punonte gazetare në Radion e Jashtme. Ndonëse në një profil krejt të ri për të, ajo u shqua për reportazhet dhe intervistat radiofonike me personalitete më të njohura të kohës, për probleme social-politike që lindën pas rrëzimit të komunizmit në Shqipëri, dhe shumë shpejt u rendit krahas gazetarëve më të mirë të mikrofonit të viteve 1950-2000, Pirro Naçe, Timo Luto, Alfons Gurashi, Agron Çobani, Amali Dhamo, Zamira Koleci.
Veçanërisht popullor u bë emisioni i saj “Mesazhe malli”, në Radion e Jashtme, që ishte një komunikim i shqiptarëve me të afërmit e tyre të emigruar në vende të ndryshme të botës, si dhe radioreportazhe për dukuritë e reja pas rrëzimit të komunizmit.
Me 1999 ajo së bashku më të shoqin, shkrimtarin dhe publicistin, Skifter Këlliçi dhe familjen, u vendos në Boston, dhe nuk u shkëput nga veprimtaria shoqërore, duke u bërë edhe presidente nderi e Shoqatës së Grave Shqiptarë.
Gjithashtu, krahas përfaqësuesve të shquar të inteligjencës së Diasporës u bë aktiviste në rrjetet sociale duke shprehur mendime rreth zhvillimeve më të mprehta që po përballet shoqëria shqiptare.
