Kryetarja e Lëvizjes Socialiste për Integrim, Monika Kryemadhi ka folur në lidhje me procesin zgjedhor të zhvilluar në Kosovë, në një intervistë për ABC News.
Teksa e vlerësoi atë si shumë pozitiv Kryemadhi tha se duhet lëxuar mirë nga politikanët por edhe nga ndërkombëtarët, pasi procesi zgjedhor në Kosovë tregoi që në demokraci ata që duhet të vendosin pasi dhe përfitojnë të parët janë qytetarët.
Do të doja ta nisnim këtë intervistë me aktualitetin politik, sidomos atë që prek të gjithë shqiptarët. Kosova brenda 24 orësh ka përmbyllur gati një proces perfekt zgjedhor. Një shtet i formuar prej 11 vitesh përmbyll një proces brenda 24 orësh gjë që Shqipëria nuk e bën prej 30 vitesh. Si e patë ju këtë proces zgjedhor?
Kryemadhi: E para, e shikoj me një pozitivitet, e shikoj si një shembull që për hir të së vërtetës duhet të tërhiqet dhe të mësojmë edhe ne politikanët shqiptarë. Ajo që është pozitive në të gjithë atë çfarë ndodhi dje është që, tashmë Kosova jo vetëm që përmirëson imazhin e saj ndërkombëtar por tregon që është e aftë për të administruar dhe për të bërë dhe atë që ne mendojmë, rotacionin politik ose ndryshimin nëpërmjet demokracisë. Është një mësim shumë i mirë për politikën shqiptare, që demokracia është ajo që bën ndryshimin, nuk janë individët ata që bëjnë ndryshimin. Demokracia tregoi që ndryshimi i pushteteve në Kosovë, do të sjellë diçka që do të përfitojnë kosovarët dhe shtetasit e saj, gjë që është shumë e rëndësishme. Megjithatë mendoj që, ta kenë lexuar të gjithë politikanët por ta lexojnë edhe ndërkombëtarët sepse është një nga elementët më të mirë për të kuptuar që funksionimi i demokracisë, funksionimi i institucioneve demokratike dhe i sistemit, është hapi i parë dhe është çelësi i çdo përfitimi të qytetarëve të një shteti, jo përfitimi politik apo momental të individëve të caktuar.
