Liridon Pula, ish-drejtori i Kadastrës Durrës, i arrestuar mesditën e 2 Tetorit në zyrën e tij, është njohur zyrtarisht nga gjykata me Mason e arrestit me burg, i dyshuar për abuzime me regjistrimin e pronave.
Në seancën e sotme, ishte i pranishëm edhe zëvendëskryeministri Erion Braçe. Pas seancës, në një prononcim për gazetarët , ai sulmoi prokurorin e çështjes Arjan Ndoja, duke u shprehur se “mbështet një grup kriminal në Durrës”. Sipas Braçes, i i njihet si person i afërt me Liridon Pulën, masa ndaj tij është e pabazuar në ligj dhe ish-drejtori po akuzohet për çështje që nuk i përkasin.
Arrestimi
Oficerë të Policisë Gjyqësore u paraqitën të mërkurën në zyrën e Pulës me vendimin e gjykatës në dorë dhe i kanë shtrënguar prangat zyrtarit të lartë në qytetin bregdetar. Arrestimi është kryer në kuadër të hetimeve që po zhvillohen nga prokurori i Durrësit, Arjan Ndoja.
Në kuadër të këtij hetimi, pak ditë më parë u prangos me urdhër ndalimi të prokurorit Ndoja edhe zv.drejtoresha e Kadastrës Durrës, Lusiena Kola. Ndaj Kolës, gjykata caktoi më vonë masën e sigurimit “detyrim për paraqitje”.
Në kuadër të të njëjtit hetim, Prokuroria e Durrësit ka shpallur në kërkim edhe ish-drejtorin e ALUIZNI-t në qytetin bregdetar, Flamur Gjuzi. Këta zyrtarë të lartë, si edhe disa vartësa të tyre, dyshohet se kanë shpërdoruar detyrën nëpërmjet legalizimit dhe regjistrimit të një numri të konsiderueshëm pronash në mënyrë anti-ligjore. Burime nga grupi hetimor deklaruan për “Boldnews.al” se pjesa më e madhe e pronave të legalizuara e regjistruara në kundërshtim me ligjin, gjenden në zonën bregdetare.
Shkarkimi nga detyra
Pas arrestimit, Liridon Pula, u shkarkua nga detyra e drejtorit të Kadastrës Durrës. Një ditë pas prangosjes së tij, u prezantua kreu i ri I këtij institucioni, Arjan Cengu.
