Ylli Manjani, ish-ministër i Drejtësisë, ka reaguar në rrjetet sociale lidhur me kandidatet për anëtarë të Gjykatës Kushtetuese.
Manjani shkruan se dy juriste të reja, këshilltare në Gjykatën Kushtetuese, nuk kaluan dot as testin për të qenë studente të Magistraturës. Por, janë propozuar të emërohen gjykatëse në Gjykatën Kushtetuese.
“Ndërsa Kristaq Trajën dhe Ledio Biankun, të dy gjykatës të Gjykatës së Strasburg, nuk i ka në refene askush.
E pra të dy duhet të ishin automatikisht gjykatës të Gjykatës Kushtetuese, pa konkurs fare! Pas 9 vitesh gjykatës në Strasburg, nuk e ka luksin ky shtet ti humbasë si kontribues.
Shtet leshi!”, mbyll reagimin e tij Manjani.
Boldnews.al ka publikuar dokumentat zyrtare që tregojnë se Arta Vorpsi dhe Elsa Toska, dy kandidate për në Gjykatën Kushtetuese, nuk kanë marrë pikët e nevojshme që u duhen studentëve për t’u regjistruar në Shkollën e Magjistraturës.
Vorpsi dhe Toska, dy këshilltare ligjore në Gjykatën Kushtetuese, u përfshinë në një testim nga Shkolla e Magjistraturës në Maj 2018 së bashku me mbi 45 ndihmës ligjorë të tjerë në institucionet e drejtësisë, përfshirë Gjykatën e Lartë dhe Prokurorinë e Përgjithshme.
Testimi u organizua në përmbushje të përcaktimeve të ligjit të Vetingut, sipas të cilit, ndihmësit ligjorë që arrin një minimum prej 60 pikësh, si edhe kalonin me sukses procesin e rivlerësimit, kishin mundësinë të fitonin statusin e magjistratit.
Juristet Arta Vorpsi dhe Elsa Toska kanë marrë përkatësisht 56 dhe 57 pikë, rezultat më i ulët sesa limiti minimal prej 60 pikësh nga 100 të mundshme, që kërkohet për pranimin e studentëve të rinj në Shkollën e Magjistraturës.
