Platforma më e ndjekur dhe e pëlqyer për shpërndarjen e fotografive, Instagram, do të bëjë një fshirje masive të disa postimeve të caktuara.
Intagram ka njoftuar se ka ndërmarrë masa më të rrepta për postimet që lidhen me prodhimet për humbjen e peshës dhe kirurgjinë kozmetike. Sipas tij, disa postime do të fshihen për përdoruesit nën 18 vjeç, ndërsa të tjera që promovojnë produkte për humbje të peshës, do të hiqen plotësisht.
Ndryshimet do të vlejnë edhe për rrjetin social Facebook, në pronësi të të cilit është Instagram.
“Ne duam që Instagram të jetë një vend pozitiv për të gjithë ata që e përdorin dhe kjo politikë është pjesë e punës sonë të vazhdueshme për të ulur presionin që njerëzit ndonjëherë mund ta ndjejnë si rezultat i mediave sociale. Këshillat janë kërkuar nga ekspertë në fushën e politikës së mediave sociale”, tha Emma Collins, menaxhere e politikave publike në Instagram.
