Fituesit “e heshtur” të tenderave të Rama-Veliaj. “4 A-M” shpk, 60 miliardë lekë publike

Nga Boldnews.al

Mbi 30 miliardë lekë (të vjetra) tendera të zhvilluar nga Ujësjellës-Kanalizime Tiranë që prej rritjes së fundit të çmimit të ujit të pijshëm, në vitin 2018, jo vetëm që nuk e ka përmirësuar situatën hidrike në kryeqytet, por, përkundrazi, gjendja është në një përkeqësim të vazhdueshëm.

Thatësira në rubinetat e qytetarëve gjatë verës dhe që po vijon edhe në ditët e para të vjeshtës 2019, dëshmon më së paku keq-menaxhim të strukturës në varësi të Erion Veliajt. Por, shumë zëra publikë, të shoqërisë civile dhe opozitën akuzojnë drejtëpërdrejtë kryebashkiakun e Tiranës se e ka kthyer një biznes shumë fitim-prurës tenderat e zhvilluar prej tij dhe institucioneve në varësi të Bashkisë së kryeqytetit.

“Boldnews.al” ka raportuar më parë se kompania “Fusha” shpk, e mirënjohur tashmë për lidhjet e saj me Erion Veliaj dhe kryeministrin Edi Ramës, është fituesja e pjesës më të madhe të parave të dhëna me tendera nga Ujësjellës-Kanalizime.

Pas “Fusha” shpk, sipas të dhënave të transaksioneve që gjenden të publikuara në portalin “openprocurment” gjendet një kompani jo shumë publike, “4 A-M”.

Në periudhën 2017-2019, “4 A-M” me ortak të vetëm dhe administrator Ardit Metaliaj, ka fituar tre tendera të Ujësjellës-Kanalizime Tiranë, në vlerë totale rreth 2.5 miliardë lekë (të vjetra).

Një prej tre tenderave të fituar nga “4 A-M” SH.P.K, të zhvilluar nga Ujësjellës-Kanalizime Tiranë

Po në të njëjtën periudhë, “4 A-M” shpk ka fituar edhe disa tenderave të zhvilluara drejtëpërdrejtë nga Bashkia e Tiranës, me vlerë totale rreth 4 miliardë lekë (të vjetra).

LEXO EDHE  Opozita ka gati paketën e propozimeve, jo negociata të fshehta/ Kryemadhi zbardh detajet

Vetëm nga Bashkia e Tiranës dhe strukturat vartëse të Erion Veliajt, kompania private është shpallur fituese në tendera me vlerë rreth 6.5 miliardë lekë (të vjetra).

Pas këtyre të dhënave paraprake, “Boldnews.al” verifikoi të tjera të dhëna për “4 A-M” shpk, në portalin “spendingdata.al”, e specializuar për publikimin e të dhënave mbi transaksionet publike nga institucionet e nivelit qëndror.

Rreth 60 miliardë lekë tendera
Të dhënat dëshmojnë se “4 A-M” shpk, për periudhën 2012-2019, është shpallur fituese në një numër shumë të lartë tenderash publikë të institucioneve qendrore, me vlera që arrijnë në total në rreth 54 miliardë lekë (të vjetra).

Autoriteti Rrugor Shqiptar është institucioni që ka kontribuuar më së tepërmi në shëndoshjen e financave të kësaj kompanie. Në bazë të të dhënave publike, rezuton se “4 A-M” shpk është shpallur fituese në një numër të konsiderueshëm tenderash, të cilët, arrijnë në vlerën e 22 milardë lekëve (të vjetra).

Gjithashtu, “4 A-M” shpk rezulton të jetë fitues në një seri tenderash të zhvilluar nga Drejtoria e Përgjithshme e Policisë së Shtetit, si edhe Ministria e Arsimit, Ministria e Kulturës, Reparti i Ndërhyrjes së Shpejtë, e institucione të tjera të qeverisjes vendore.