Pasditen e sotme u denoncua një atentat i dështuar ndaj djalit të deputetit socialist, Spartak Braho. Sipas denoncimit të bërë nga ish-Kryeministri, Sali Berisha, atentatit i shpëtoi Arbër Braho, të cilit i kishin ngritur pritë dy persona të armatosur. Ngjarja ka ndodhur më 18 gusht, ndërsa policia në njoftimin e saj e trajtonte ngjarjen si një incident për nje vend parkimi.
Në njoftimin e policisë thuhej se kishte nisur procedimi penal ndaj njërit prej djemve të deputetit, shtetasit A.B (Arbër Braho), por ishin shpallur në kërkim edhe dy shtetas të tjerë për kanosjen e djalit tjetër të ligjvënësit socialist, Kreshnik Brahos, që është edhe prokuror.
Sipas policisë, shtetasi i shpallur në kërkim për kanosje ishte L.K.
Po kush është ky shtetas?
Lajden Kadilli, 26 vjeç, u përfshi në një konflikt me djemtë e deputetit socialist, Spartak Braho, që më pas degjeneroi në kanosje me armë.
Kadilli rezulton me precedentë penalë në të shkuarën, shkruan Panorama. Më 18 gusht, ditën kur ka ndodhur ngjarja, me djemtë e deputetit socialist, Lajden Kadilli, ka qenë bashkë me babain, Arjan Kadillin.
Kadilli është shpallur në kërkim nga policia pas kanosjes me armë zjarri. Sherri ka lindur për shkak të një parkingu në pallatin ku banon djali i Brahos në qytetin e Durrësit. Lajden Kadilli ka lënë një motor në vendin e parkingut dhe pas sherrit, ai është rikthyer i armatosur duke kanosur 35 vjeçarin.
Mësohet gjithashtu se Lajden Kadilli ka qëlluar me qytën e automatikut xhamin e makinës ku ndodhej Kreshnik Braho dhe ky i fundit është larguar me shpejtësi nga vendi i ngjarjes.
Ndërkohë, policia sqaron se ishte proceduar penalisht djali tjetër i deputetit socialist, Arbër Braho, pasi kishte goditur me sende të forta forta shtetasit A. K., 58 vjeç, dhe L.K., 30 vjeç duke i shkaktuar dëmtime trupore.
Gjithsesi, mbi Kadillin rëndojnë disa vepra penale. Aktualisht, ai është në kërkim nga policia.
