Agim Kajmaku, kryebashkiaku i Rilindjes për Vorën, dalë nga votimet e 30 qershorit, ka 5 ditë kohë për të dhënë gjurmët e gishtërinjve, pas akuzave të artikuluara nga opozita dhe dokumenteve të publikuara, se ai ka çështje të hapur me drejtësinë greke me akuzën e fallsifikimit të kartmonedhave.
Në dokumentet e publikuara, Jorgo Toto, u arrestua nga autoritetet greke në Janar të 2003 bashkë me dy shqiptarë të tjerë, pasi u kapën me mbi 4500 euro false, në një shumë prej 12 mijë eurosh që kishin paguar për të blerë fidanë.
Pas akuzave të opozitës dhe publikimit të dokumenteve, ditën e premte, 23 gusht, Prokuroria e Përgjithshme, i është drejtuar me letërporosi autoriteteve greke, për të marrë informacion mbi kryetarin e bashkisë së Vorës.
Njësia e Dekriminalizimit gjithashtu i ka kërkuar Agim Kajmakut që të depozitojë në policinë shkencore gjurmët e gishtave. Shkresa nga Drejtoria e Dekriminalizimit ka shkuar pranë subjektit të verifikimit, në rastin konkret Agim Kajmakut, dhe brenda 5 ditëve, pra deri më 30 gusht, ai duhet të paraqitet për të dhënë gjurmët.
Kryebashkiaku i Vorës dyshohet se ka ndryshuar identitet nga Jorgo Toto në Agim Kajmaku pas një problemi me drejtësinë greke. Rasti në fjalë nuk është pasqyruar nga kryebashkiaku i Vorës në formularët e vetëdeklarimit. Nëse akuzat rezultojnë të vërteta, Agim Kajmaku duhet ti nënshtrohet ligjit të dekriminalizimit.
Pas Valdrin Pjetrit, Kajmaku bëhet i dyti kryebashkiak i Ramës në votimet e 30 qershorit, që rrezikon dorëzimin e mandatit të kryebashkiakut, nga 61 të tillë që Rilindja mandatoi në këtë proces.
