Prej gati 9 muajsh, banorët e Astirit vazhdojnë vazhdojnë protestën e përditshme në mbrojtje të banesave të tyre, të cilat rrezikojnë të shemben nga projekti i “Unazës së Re”.
Në protestën e mbrëmjes së sotme iu është bashkuar dhe nënkryetari i PD, Edmond Spaho.
Spaho garantoi mbështetjen e opozitës për këtë kauzë dhe i kërkoi qeverisë që të ofrojë zgjidhje duke dëmshpërblyer banorët.
“Asgjë nuk e pengon qeverinë që të zbatojë këtu një model shembullor të dëmshpërblimit të qytetarëve ku ndërtohen vepra të infrastrukturës. Askush nga këta banorë nuk kërkon të pengojë projektet infrastrukturore, por kërkon një shpërblim të drejtë në përputhje me ligjin. Përse qeveria qënka në gjendje të japë 258 milion euro për 17 kilometra rrugë nga Miloti në Balldre, dhe nuk qënka në gjendje tu japë asnjë euro qytetarëve të kësaj zone. Asgjë nuk e pengon, veçse dëshira për ti shërbyer oligarkëve dhe jo qytetarëve të vet.”
Spaho i bëri apel shqiptarëve që të ngrihen se nesër do të jetë rradha e tyre.
“Ju bëj thirrje të gjithëve që të çohen dhe të vijnë këtu te Unaza e re, të vijnë tek Teatri Kombëtar, për të mbrojtur këto dy kauza të rëndësishme shoqërore sepse po ndejnjëm indiferentë nesër do ta pësojmë vetë.”
Nënkryetari demokrat paralajmëroi qeverinë dhe apeloi policinë që të mos zbatojë urdhëra të paligjshëm ndaj banorëve të Unazës së re.
“Ne e dënojmë dhunën policore dhe e paralajmëorjmë policinë nga niveli më i lartë hirarkik deri të më i ulti: keni kujdes nga urdhërat që merrni dhe zbatoni. Nesër do të jetë vonë për ju sepse do të përgjigjeni para ligjit.”
Duke folur për zgjidhje, nënkryetari i PD, Edmond Spaho tha se qeveria duhet të negociojë me banorët dhe tu ofrojë atyre zgjidhjen që pranojnë ndryshe do të ketë përplasje të forta.
“Si mund të lihen qytetarët e vendit 9 muaj në rrugë. Të kontaktohen banorët dhe të gjejnë një zgjidhje, që do të vendoset nga qytetarët. Në të kundërt do të ketë përplasje të fortë. Neve do të na kenë gjithmonë pas derisa të ketë një zgjidhje të favorshme”, u shpreh Spaho.