Tre persona, mes të cilëve dy doganierë, janë arrestuar nga policia e Kukësit për vepra penale që lidhen me kontrabandën e mallrave.
Policia njoftoi se, specialistët e Seksionit për Hetimin e Krimit Ekonomik e Financiar në DVP Kukës, në vijim të punës për goditjen e aktivitetit të kontrabandimit të mallrave, arrestuan në flagrancë shtetasit, G.Sh. 29 vjeç, banues në Shtiqen, Kukës dhe H.B., 59 vjeç, banues në Tiranë e B.V., 47 vjeç, banues në Kukës, të dy me detyrë doganier në Doganën e Morinës.
“Arrestimi i shtetasit G. Sh., u bë pasi, në aksin rrugor Morinë – Kukës nga shërbimet e DVP, është ndaluar automjeti tip ‘Iveko’ fugon mallrash, me drejtues shtetasin e mësipërm, i cili kishte të ngarkuara 267 pako lëndë plastike (materiale ndërtimi), pa dokumenta shoqëruese.
Pas veprimeve hetimore rezultoi se ky shtetas ka hyrë nga PKK Morinë, pa kryer detyrimet doganore.
Arrestimi i shtetasve H. B., dhe B. V., u bë pasi, duke qenë në detyrë, nuk kanë kryer veprimet për zhdoganimin e mallit.
Në cilësinë e provës materiale u sekuestrua mjeti së bashku me mallin”, bënë me dije burime zyrtare.
Materialet për veprime të mëtejshme i kaluan Prokurorisë pranë Gjykatës së Rrethit Gjyqësor Kukës, për veprat penale “Kontrabanda me mallra të tjera” dhe “Kontrabanda nga punonjës që lidhen me veprimtarinë doganore”, shtuan të njëjtat burime.
