Nga Boldnews.al
Kryeministri Edi Rama ka dy rrugë për të shkuar deri në çmenduri politike që do e kalonte në vdekje klinike sistemin demokratik. Të mbajë zgjedhjet më 30 qershor pa pjesëmarrjen e opozitës, të fitojë pa garë 61 bashkitë e vendit; dhe shkarkojë Presidentin e Republikës, me argumentin se ka shkëlur rëndë Kushtetutën e vendit. Që të dyja marrëzitë kanë një fund, ajo është diktatura e plotë.
“Vendimi i presidentit ishte i pritshëm! Ne jemi Republikë Parlamentare, jo presidenciale. Ndaj asgjë s’na ndal të vijojmë përpara me 30 qershorin. Të enjten debat shumë i gjatë parlamentar. Të shpalosim të gjitha argumentat kundër këtij vendimi të Presidentit. E enjtja do të finalizohet me rezolutë për shkarkimin e presidentit. Duhet të fokusohemi në 30 qershor. Jemi në mes të lojës. Pas debatit çështja diskutohet në KQZ e më pas do kalojë në kolegj. Fokusi jonë 30 qershori.”-mësohet të jetë shprehur Rama.
Po u tha nga ai, mos prisni që deputetët socialistë, apo ato gjoja opozitarë që kanë fituar mandatin pas largimit të deputetëve të opozitës të kundërshtojnë të “madhin” Ramë. Fjala e tij është ligj, aksion, nismë dhe do gjenden plot “kamikazë politik” që dalin në mbrojtjë të kryeministrit, në nismën e paprecedent të 29 viteve demokraci hibride në nismën për shkarkimin e kreut të shtetit.
Ka nisur të besojë me kushiencë brenda inkoshiencës së përhershme të tij, se ky është një “puç shteti” që po o bëhet nga armiku i brendshëm, presidenti i republikës. Por çfarë thuhet në Kushtetutën e Republikës lidhur me shkarkimin e Kreut të Shtetit nga Parlamenti?
Në nenin 90, Kushtetuta e Republikës së Shqipërisë parashikon rastin kur shkarkohet Presidenti. “Presidenti i Republikës mund të shkarkohet për shkelje të rëndë të Kushtetutës dhe për kryerjen e një krimi të rëndë. Propozimi për shkarkimin e Presidentit në këto raste mund të bëhet nga jo më pak se një e katërta e anëtarëve të Kuvendit dhe duhet të mbështetet nga jo më pak se dy të tretat e të gjithë anëtarëve të tij. Vendimi i Kuvendit i dërgohet Gjykatës Kushtetuese, e cila, kur vërteton fajësinë e Presidentit të Republikës, deklaron shkarkimin e tij nga detyra”.
E para Rama pretendon se kreu i shtetit ka shkelur kushtetutën, ky është opinion, politikë ditore, por aspak provë apo vendim institucional. Piktori e ka të vështirë të lexojë dhe interpretojë aktet ligjore, e aq më tepër ato Kushtetuese. I vetmi institucion përgjegjës që bën interpretime dhe jep vendime është Gjykata Kushtetuese. Ky institucion nuk ekziston prej më shumë se një viti. Gjasat janë që nuk do të ngrihet as në javët në vijim.
Pika e dytë që kërkohet shkarkimi është kur ka kryer një krim të rëndë. Kjo nënkupton një krim i rëndë me prova të dukshme dhe i kapur në kushtet e flagrancës. As kjo nuk ekziston, por kryeministri është i vendosur në të tijën të paktën ta provojë dhe kërcënojë hapur kreun e shtetit.
Nuk është më luftë nervash dhe përplasje institucionesh demokratike, por rreziku që po përfshin vendin, ku më 1 korrik të këtij viti vendi mund të kalojë edhe “zyrtarisht” në sistem njëpartiak dhe regjim të fortë autoritar. Me marrjen e të gjithë bashkive pa garë, Rama do jetë kryeministri me superfuqi prej Sulltani, kur kontrollon të gjithë pushtetet, legjislativin, ekzekutivin dhe gjyqësorin, tashmë edhe pushtetin lokal. Ndaj ai sot kërkon “puçistët” kudo. Rruga drejt diktaturës sapo është shtruar…!
