PËRGJIMET &#8211; Merrte urdhra nga Avdyjat/ Kandidati për kryebashkiak: Jap dorëheqjen nëse&#8230;

Kandidati i Partisë Socialiste në Shijak, Elton Arbana, ka reaguar pas publikimit të audio-përgjimit mes tij dhe Astrit Avdylajt.

“Sapo e ndoqa materialin në media. Kam komunikim me shumë qytetarë, por kryetari i Partisë nuk ka akses në asnjë institucion. Ky është komenti im. Nëse është e vërtetë unë jap dorëheqjen. S’ka lidhje kandidimi im me atë. Jam i dashuruar pas Shijakut ndaj më vendosën mua.”-tha ai në një lidhje telefonike për Report Tv.

Lidhur me pozicionin e Arbanës, teksa publikon një prej përgjimeve, gjermania Bild sqaron: Astrit Avylaj, kreu i grupit kriminal në Shijak, telefonon Arjan Ndraxhin, vëllain e “Lirit” (Ilir Ndraxhit) sot deputet i Partisë Socialiste. Avdylaj ka një kërkesë për kryeministrin Edi Rama, përmes kryebashkiakut të Durrësit, Vangjush Dako që Ilir Ndraxhi të përfshihet në listën e kandidatëve për deputet në Qarkun e Durrësit. Gjatë bisedës, bosi i krimit, Astrit Avdylaj telefonon vëllain e kandidatit socialist dhe e pyet atë nëse vëllai i tij, kandidat potencial, ka marrë një telefonatë (nga lart) për t’u konfirmuar si kandidat i PS. Gjithashtu, Astriti zotohet se do të punojë fort aq sa ata do të surprizojnë të gjatin (Edi Ramën) me një rezultat pozitiv ‘10:0’. Disa ditë më pas Ilir Ndraxhi konfirmohet si kandidat i PS për deputet në qarkun e Durrësit. Elton Arbana, atëherë kryetar i PS për Bashkinë e Shijakut është përmendur në një bisedë si kandidat për deputet që grupi krimminal Avdylaj është duke punuar për ta vënë në listë, por renditja në listë nuk është favorizuese (10-11). Më vonë marrëveshja ndryshon, Elton Arbana nuk është përfshirë në listë, por i është premtuar diçka e mirë. Elton Arbana është sot kandidat i PS në Bashkinë e Shijakut në zgjedhjet vendore të 30 qershorit 2019. (LEXO: PËRGJIMI 3)

Në një tjetër përgjim, Astrit Avdylaj flet me Arbanën, duke i dhënë urdhra.

“Po s’ka qenë aty Vangjush o vlla, se ka qenë atje me Edin ai.. Merre o vlla në telefon. Merre thuji o b*** se ka shku tu von gjoba te njerëzit edhe nëpër farma, me nga 5 mln lekë o vlla. Tashti, se nuk o Vangushi ktu..“, i drejtohet në telefon Avdylaj-Arbanës.