Tërbohet Rilindja, nuk merret me faktin, por kush i nxorri përgjimet

Nga Boldnews.al

Symtësia, arroganca, mllefi dhe pasiguria ka mbështjellë një pjesë të madhe të elitës drejtuese të Rilindjes së Edi Ramës. Deputetët socialistë kanë shfryrë sot në Komisionin e Ligjeve, duke kërkuar “tradhtarin” në radhët e prokurorisë dhe gjetur mënyrën sesi ra në duart e gazetarit gjerman një pjesë e përgjimeve të dosjes 339.

Askush prej tyre nuk u shqetësua se aty flitet për shitblerje votash, por ndikimin e drejtëpërdrejtë të grupeve kriminale në përcaktimin e rezultatit zgjedhor të vitit 2017, apo sesi të akuzuarit për trafik droge ndikojnë në kërkimin e favoreve dhe përcaktimin e “kuadrove” për ti pasur nën kontroll.

“Të hetohet nxjerrja e sekretit hetimor, të hetohen të gjithë ata prokurorë dhe oficerët e Policisë Gjyqësore që kanë braktisur detyrën dhe e shpërdoruar atë, duke i marrë dosjet penale për ti dërguar në zyrat e Partisë Demokratike”-deklaroi kreu i Komisionit të Ligjeve Ulsi Manja. Një personazh edhe ky mëse grotesk, për më shumë deri diku në “konflikt të hapur interesi”, pasi është akuzuar nga opozita si i përfshirë drejtëpërdrejtë në shitblerjen e votave në zgjedhjet lokale në Dibër.

Për Rilindasit gjithçka flitet në audiopërgjimet e pastra aferash është një proces rutinë dhe nuk shqetësohen nga faktet e publikuara. Ata kërkojnë me ngulm kush qe ai “pusht” që përgjimet ku në çdo rast shfaqet Vangjuash Dako ia dha medias gjermane. Inatin e kanë edhe me Artën, sepse “njeriu i tyre” në Prokurorinë e Përgjithshme, nuk qe në gjendje që të mbyllte atje ku nuk do kishin dritën e trasparencës ata përgjime komprometuese.

LEXO EDHE  Ja pse Tahiri u nxeh me prokurorët/ Zbardhet deklarata në sallën e gjyqit…

Me siguri Arta dhe Prela, dy gratë e “forta” që kanë marrë pushtet nën izmin e Rilindjes, po kryejnë hetime të thella për të gjetur njeriun që shkëputi një pjesës të vogël të audiopërgjimeve për tia dorëzuar gazetarit gjerman të BILD.

Por kjo dosje ka nisur të shpërndahet në disa duar. Ajo që dy gratë e prokurorisë duhet të ruajnë fort, është dosja 184 që përfshin dyshimin e madh për shitblerjen e votave në Dibër. Aty dyshohet se është implikuar elita drejtuese e Rilindjes nga deputetë të rëndësishëm deri në ish-ministra të kabinetit Rama.

Por ndërsa deputetët socialist rendin pas konferencash shtypi dhe po bëhen gati për të veshur kostumin më të shtrenjtë që të kapin emisionet e darkës, kryeministri Edi Rama, i shpërfytëruar i hallakatur me beshje sportive dhe duke çaluar në një këmbë bëri një xhiro nga Korça ku ra tërmeti.

Ai më shumë se kushdo është në hall, pasi edhe nëse ka menduar dorëheqjen, atë nuk e lënë ta bëjë diçka të tillë. Bosët e trafikut që e ushqyen me vota për të marrë i vetëm pushtetin, nuk mund ta lenë aq lehtë të ikë, haraçin e duan deri në fund…!