Nga Boldnews.al
Miroslav Lajçak, kryetar i rradhës i OSBE-së, ministër i jashtëm i Sllovakisë, deklaroi sot në Tiranë, se vazhdimi i protestave të dhunshme do të dëmtojë përpjekjet e Shqipërisë për reformat dhe padyshim do të pengojë për realizimin e përparësive të brendshme dhe ndërkombëtare.
“Dëshiroj të theksoj se institucionet e forta me një parlament efikas janë gurët themelorë të demokracisë dhe janë të qenësishëm për stabilitetin e shtetit ligjor. Nxis aktorët politik të angazhohen në forcimin e këtyre institucioneve. Protestat paqësore janë një e drejtë themelore që duhen respektuar. Dallimet duhet të debatohen në Parlament nga të gjithë përfaqësuesit përfshirë dhe opozitën”, tha ndër të tjera Lajçak.
Deklarata e kreut të rradhës së OSBE-së mund të interpretohet si një qëndrim kundër opozitës dhe pro qeverisë, me idenë se faktori ndërkombëtar është në krah të Edi Ramës, kryeministrit që prej 16 shkurtit, mijëra shqiptarë në sheshe dhe rrugë i kërkojnë të largohet.
Por në fakt, nëse do të hulumtohet, të gjithë diplomatët apo zyrtarë të tjerë, burokratë të Brukselit apo europarlamentarë, që shfaqen në krah të Ramës, sa herë ndodhet në vështirësi, janë në listat e preferuara të miliarderit Xhorxh Soros.
Ndër ta është edhe Lajçak, i cili është lobuar nga Soros për të ardhur në Shqipëri dhe për të ndikuar në politikën shqiptare në vitin 2011.
Nuk është e vështirë të gjendet letra që Soros i ka drejtuar në atë kohë ish-Sekretares amerikane të Shtetit, Hillary Clinton, ku i rendit 3 emra që mund të vijnë në Shqipëri për të ndërmjetësuar mes politikës shqiptare.
Ishte koha kur Edi Rama ishte në opozitë dhe organizoi protestën e 21 janarit.
“Një situatë serioze ka lindur në Shqipëri, e cila ka nevojë për vëmendje urgjente në nivele të larta të qeverisë amerikane. Ju ndoshta mund ta dini që një demonstratë opozitare në Tiranë, të premten, rezultoi me pasojë vdekjen e tre personave dhe shkatërrim pronash.
Ka shqetësimë serioze rreth trazirave të mëtejshme të lidhura me një kundër-demonstratë që do të organizohet nga partia qeverisëse të mërkurën, që do të ndiqet nga një event i opozitës dy ditë më vonë, për të përkujtuar viktimat.
Pamja e dhjetra mijërave njerëzve që vërshojnë rrugët, në një mjedis politik tashmë të ndezur, është një ogur i keq për prishjen e rendit publik dhe procesin e brishtë demokratik të vendit”, i drejtohej Soros në atë kohë Clinton, ndërsa i sugjeronte 3 emra, njëri prej të cilëve ishte Miroslav Lajçak. Në fakt ky i fundit, erdhi në Tiranë, si përfaqësues i BE-së për të ndërmjetësuar palët.
Sipas Lajčák, institucionet e forta me një parlament efikas janë gurët themelorë të demokracisë, ndërsa nxit aktorët politik që të angazhohen në forcimin e këtyre institucioneve.
Sot në Tiranë erdhi, po Lajçak, që si kryetar i rradhës së OSBE-së, zgjodhi sërisht t’i qëndrojë në krah kryeministrit Edi Rama, që po kalon një situatë të vështirë, jo vetëm për shkak të protestave, por edhe për shkak të skandaleve qeveritare të njëpasnjëshme. Dhe kësaj i shtohet edhe fakti që në qershor Këshilli Europian nuk do t’i hapë negociatat Shqipërisë, që përbën dështimin e 3 në 3 vitet e fundit për qeverinë Rama.
