Kryeministri Edi Rama thirri sot në një mbledhje drejtorët rajonalë të Shërbimit Kombëtar të Punësimit, takim i zhvilluar në Kryeministri dhe që zgjati për rreth 30 minuta.
Takimi vjen dy ditë para se socialistët të hapin zyrtarisht fushatën për zgjedhjet lokale të 30 qershorit, ndërsa sikundër raportohet në dallim nga herët e tjera Rama ka ulur tonet dhe u është drejtuar miqësisht të pranishmëve.
“U kujtova t’ju mbledh vetë pas 4 muajsh nga takimi i fundit sepse ju, Shërbimi Kombëtar i Punësimit, ishit përmendur në Progres Raportin e BE për çeljen e negociatave dhe gjithashtu jeni përmendur edhe në Raportin e Bankës Botërore për rezultate konkrete. Se kam për natyrë të jem kaq i ëmbël por s’kam asgjë tjetër vetëm t’ju them faleminderit përzemërsisht që keni promovuar imazhin e progresit të vendit dhe keni garantuar stabilitet në arritjen mujore të objektivave të ndërmjetësimeve për punësim”, është shprehur Rama, raporton Newsbomb.
Në vijim Rama është shprehur se në çdo mbledhje qeverie e kam përmendur shembullin tuaj se si me po të njëjtët njerëz, nëse motivohen dhe shtrëngohen, monitorohen nga një institucion inekzistent në treg, mund të bëhet një progres i jashtëzakonshëm.
“Jam këtu jo për t’ju frikësuar apo shkarkuar drejtorin e radhës nën objektiv, por për të dëgjuar çdo kërkesë tuajën”, tha Rama.
Kryeministri nuk anashkaloi fiksimin e tij, teksa përmendi sërisht Kukësin që tashmë zyrtarisht e ka ‘peng’.
“O Kukësi hë mo si e kam Kukësin? Në vijë të parë të sulmit i përgjigjet Drejtori Rajonal i Kukësit z.L.Halilaj.’
Mbani ritmin sepse vetëm kështu dhe së bashkë mund të bëjmë progres raporte në çdo sektor. Objektiva kanë edhe institucionet tjera, por jo të gjithë i realizojnë. Ju do keni edhe një sistem shpërblimesh që po e mendoj me kontribut edhe nga privati’, mbylli fjalën e tij Rama, raporton Newsbomb.
