Bukurije Gjonbalaj, ish-ambasadore e Kosovës në Itali, është emëruar si këshilltare për integrimin, pranë ministrit në detyrë të Punëve të Jashtme, Gent Cakaj.
Burime nga Minisria e Jashtme bëjnë të ditur se emërimi i Gjonbalajt është bërë nga ministri Cakaj, ndërsa ky vendim vjen disa javë pasi ai ndërmori një sërë lëvizjesh në rradhët e diplomacisë shqiptare.
Ndërsa deklaroi se do të ndërpriste lidhjet nepotike në diplomacinë shqiptare apo emërimet e kryera pa kriter, Cakaj firmosi lëvizjet e disa ambasadorëve dhe diplomatëve, por edhe stafit në Ministrinë e Jashtme, që e drejton me delegim të kryeministrit Edi Rama, i cili zyrtarisht në bazë të dekretit të Presidentit Ilir Meta është edhe ministër i Punëve të Jashtme dhe Europës.
Mediat në Kosovë kanë akuzuar kohë më parë këshilltaren e re të Cakajt se nuk pranoi të linte detyrën e diplomates në Itali, ndërsa ishte dekretuar për këtë post Alma Lama.
Gjithashtu mediat në Kosovë kanë shkruar mbi lidhjet e Gjonbalajt me Presidentin Hashim Thaçi.
Ky i fundit në nëntor të 2018, ka nxjerrë dekretin madje për largimin e Ambasadores së Kosovës në Itali, për të rikthyer në detyrë Bukurije Gjonbalajn.
“Urdhërohet tërheqja nga Misioni Diplomatik i znj. Alma Lama, Ambasadore/Shefe e Misionit Diplomatik të Republikës së Kosovës në Republikën e Italisë. Ngarkohet Ministria e Punëve të Jashtme e Republikës së Kosovës që të ndërmarrë të gjitha veprimet e nevojshme për zbatimin e këtij Dekreti. Dekreti hyn në fuqi në datën e nënshkrimit”, shkruan në Dekretin e nënshkruar nga presidenti i Kosovës, Hashim Thaçi, raporton Koha.net.
Ky dekret është marrë në mbështetje të nenit 84 pikat (4, 10 dhe 25) të Kushtetutës së Kosovës, nenit 6 të Ligjit nr. 03/L-094 për Presidentin e Republikës së Kosovës, nenit 23 (I.I) të Ligjit nr 03/L – 122 për Shërbimin e Jashtëm të Republikës së Kosovës, nenit 3 (4) të Rregullores (P) nr. 02.2016 për Strukturën Organizative të Presidencës (08.09.2016), si dhe duke marrë parasysh shkresat e Ministrisë së Punëve të Jashtme, të pranuara nga Zyra e Presidentit më 25.07.2018 dhe 08.08.2018.
Lama ishte ngarkuar me punë në postin e Ambasadores së Kosovës në Itali më 2016, pas koalicionit qeverisës të arritur mes LDK-së dhe PDK-së, me ç’rast, deputetja e atëhershme, Alma Lama, e kishte dhënë votën për ta bërë president Hashim Thaçin.
Koha.net, nga burime brenda institucioneve qeveritare, ka mësuar se postin e Lamës do ta pasojë ish-Ambasadorja e Kosovës në Itali, Bukurije Gjonbalaj.
Bukurije Gjonbalaj ka lindur në afërsi të qytetit të Rozhajë (në Malin e Zi) dhe është rritur në Prizren. Bukurija ka filluar që të punojë për UNMIK-un, në vitin 2000 si një asistente legale. Mediat në kosovë kanë raportuar se ajo është bërë dhe anëtare e Bordit të RTK-së për shkak të lidhjeve të saj diplomatike.
