Kryeministri Edi Rama tha se opozita e ka të sigurtë se do të humbiste zgjedhjet e rradhës ndaj sot është në rrugë.
Referuar zgjedhjeve të 2017-ës, Rama tha se ka qenë procesi më i qetë i mundshëm, dhe asnjë nga përfaqësuesit e opozitës nuk ka ngritur pretendime mbi rezultatin e zgjedhjeve.
“Në demokraci palët nuk mund të negociojnë as rezultatin e zgjedhjeve, as kryeministrin. Zgjedhjet në 2007-ën janë shtyrë brenda kornizës ligjore, pasi Kushtetuta nuk e kishte të përcaktuar kornizën e afateve.
Propozimin për vendosjen e kornizës kohore e ka bërë kryeministri i kohës, ndërsa ne e mbështetëm, në mënyrë që të mos përsëritej kjo gjë.
Sot Kushtetuta e Shqipërisë e ka të përcaktuar dhe Presidenti dekretoi datën fundore kushtetuese dhe kjo situatë ka marrë fund”, tha Rama.
I pyetur sepse qeveria i përgjigjet studentëve dhe jo qytetarëve që sot protestojnë, Rama tha në emisionin “Open”, se ka një dallim të madh, pasi studentët janë një grup interesi, ndërsa këta nuk janë një grup interesi, por një grupim politik që kërkojnë pushtet, nuk kërkojnë përmirësimin e rregullave të lojës, por kërkojnë që të hapin rrugën e pushtetit duke imponuar në mënyrë anti-demokratike diçka që nuk do e marrin dot.
“Nuk është karrigia apo mandati im, por është mandate i shumicës dërrmuese që më besuan të kryesoj qeverinë. Kurrë nuk bëhem pjesë e një historie që kurrë nuk do të zgjidhte problemin, por do të hapte problemin që do e ndiqte Shqipërinë kushedi sa vite”, tha Rama.
I pyetur nëse do të shkohet ose jo drejt një konflikti civil, Rama tha se nuk mund të ndodhë kjo pasi nuk kemi një popull në konflikt civil. Sipas Ramës sot jemi në një konflikt politik.
“Unë bëj debat me këdo qoftë që kam përballë në Kuvend, përfshi edhe Kujtim Gjuzin, që nuk e çova unë në Parlament, por e ka vendosur Lulzim Basha dhe Monika Kryemadhi. Nëse nuk doni Kujtim Gjuzin në Kuvend, mos votoni Lulzim Bashën”, tha Rama. Ai shtoi se oferta e tij është data 30 qershor dhe nuk ka asnjë ofertë tjetër.
“Nuk negociohet ajo që më mandatuan shqiptarët në 2017, unë nuk i tradhëtoj ato që më kanë dhënë votat”, tha Rama, duke shtuar se protestat po bëhen nga një popull imagjinar me punonjës bashkish, me punonjës kanalizimesh dhe me ca që venë maska.
