Ndërsa vendet e Ballkanit Perëndimor presin me ankth progres raportin për hapjen e negociatave me Bashkimin Evropian, një goditje e fortë vjen nga Franca.
Ish-ministrja e Punëve të Jashtme në qeverinë e Macron i mbyll derën Shqipërisë dhe Maqedonisë së Veriut për hapjen e negociatave në muajin qershor.
Në një intervistë të dhënë për RTL, ish ministrja Nathalie Loiseau tha se Franca nuk ka ndryshuar qëndrim për hapjen e negociatave.
“Nuk do të ketë hapje negociatash mes BE dhe Shqipërisë dhe Maqedonisë së Veriut në qershor. Në Francë nuk kemi ndryshuar qëndrim dhe do të vazhdojmë ta mbajmë atë. Vendet e Ballkanit janë gjeografikisht në Evropë dhe duhen ndihmuar, por për çështjen e zgjerimit përgjigjja është JO”, tha
Loiseau.
Në intervistën për RTL, ish-diplomatja merr të gjithë përgjegjësinë për vendimin e liderëve të BE në vitin 2018, ku u shty hapja e negociatave.
“Ajo që bllokoi hapjen e negociatave me Shqipërinë dhe Maqedoninë e Veriut isha unë, kur mbaja postin e ministres. Çështja e zgjerimit vendoset me votë unanime dhe vitin e shkuar kalova 8 orë për t’iu shpjeguar homologëve të BE që isha kundër, në përputhje të plotë me presidentin Emmanuel Macron”, nënvizoi ish ministrja Loiseau, e cila beson që dyert e BE do të mbeten të mbyllura për Tiranën dhe Shkupin edhe në samitin e ardhshëm në Qershor të liderëve të BE.
