Një grup i cili ushtronte aktivitetin e përpunimit dhe shitjes së lëndëve të forta narkotike në qytetin e Fierit dhe në qytete të tjera është goditur nga policia. Burime zyrtare njoftuan se tre persona u vunë në pranga, ndërsa një tjetër i shpall në kërkim. Gjithsej u sekuestruan 1,4 Kg Heroinë dhe 1 Kg Kokainë.
Aksioni
“Operacioni antidrogë i koduar ‘Shënjestra’ erdhi pas një hetimi disa mujor të ndjekur me metoda speciale të hetimit, nga Seksioni për Hetimin e Narkotikëve në Drejtorinë Vendore të Policisë Fier. Gjatë operacionit u godit një grup i cili ushtronte aktivitetin kriminal të përpunimit dhe shitjes së lëndëve të forta narkotike Heroinë dhe Kokainë në qytetin e Fierit dhe në qytete të tjera. Si rezultat i operacionit, në banesat e këtyre shtetasve u gjet dhe u sekuestrua rreth 1,4 Kg lëndë narkotike e dyshuar Heroinë dhe rreth 1 Kg lëndë narkotike e dyshuar Kokainë. Një pjesë e Heroinës ishte e ndarë në doza të vogla gati për shitje. Gjithashtu në cilësinë e provës materiale u sekuestrua dhe 1 armë gjahu pa leje”, njoftoi Policia e Fierit.
Arrestimet
- T., 47 vjeç, banues në Bishanak, Fier (i dënuar më parë për grabitje me dhunë).
- T., 22 vjeç (djali i I. T), banues në Bishanak, Fier.
- T, 51 vjeçe (kunata e I. T), banuese në Bishanak, Fier.
U proceduan penalisht në gjendje të lirë 2 shtetas të tjerë dhe vijojnë hetimet për të parë implikimin e tyre në këtë veprimtari kriminale.
Gjithashtu u shpall në kërkim dhe po punohet për kapjen e shtetasit Z. T., 55 vjeç, i dyshuar si bashkëpunëtor i shtetasve të arrestuar për këtë veprimtari kriminale.
Materialet procedurale i kaluan Prokurorisë pranë Gjykatës së Shkallës së Parë Fier për veprime të mëtejshme hetimore, për veprat penale “Prodhimi dhe shitja e lëndëve narkotike”, “Nxitja për përdorimin e drogës” dhe “Mbajtja pa leje e armëve të gjuetisë dhe sportive”, njoftoi Policia.
