Presidenti Ilir Meta ka postuar në rrjet një koment lidhur me ato që i quan delirime gjoja patriotike që bëhen nga politikanët autoritarë për t’u shmangur nga llogaridhëniet e brendshme.
Duket se me këtë postim në rrjet, Meta ka thumbuar kryeministrin Edi Rama dhe Presidentin e Kosovës, Hashim Thaçi, të cilët në muajt e fundit kanë mbështetur tezat për ndryshime kufijsh mes Kosovës dhe Serbisë, me shkëmbime territoresh.
‘Dëgjojmë shpesh: “Pse të mos bashkohen të gjithë shqiptarët? Pse të mos bashkohen të gjithë serbët? Pse të mos bashkohen të gjithë kroatët?
Pse të mos bashkohen të gjithë boshnjakët?” Këto delirime, gjoja patriotike, më shumë se sa folklorizëm, janë një diabolizëm i gjallë.
Është një përpjekje e politikanëve autoritarë, shpeshherë në mënyrë të koordinuar, për t’u shmangur nga llogaridhëniet e brendshme dhe për të provokuar tema që spostojnë vëmendjen e opinionit dhe përgjegjësitë e tyre”, shkruan Meta.
Më herët, Presidenti po në rrjet ka shkruar se në Ballkan çdo komb është diku shumicë dhe diku pakicë.
“E vetmja zgjidhje është bashkëjetesa dhe respektimi i standardeve europiane për pakicat. Ne e dimë shumë mirë se çfarë ka ndodhur në Ballkan. Qindra mijëra njerëz u vranë dhe asnjë centimetër kufi nuk u ndryshua”, shkruan Meta.
