Gati një muaj pasi e ‘ktheu’ Holandën në “narko-shtet”, vjen aksioni tjetër i pastrimit të imazhit të Edi Ramës nga televizioni kombëtar “Top Channel”.
Këtë të mërkurë, në emisionin që drejtohet nga Alban Dudushi, gazetari i emëruar më 7 Mars 2018 me firmën e Ramës, anëtar i agjencisë shtetërore për Mbështetjen e Shoqërisë Civile, u shfaq sërish propaganda e Rilindjes.
“Marokenët dhe polakët janë kryetrafikantët e drogës në Holandë”; “Shqiptarët nuk janë më të rrezikshmit”; “Mediat holandeze e kanë nxirë Shqipërinë pa fakte”; apo “Gjermanët kryejnë më shumë krime se shqiptarët”, janë disa mesazhet që u përcollën në emision e transmetuar mbrëmjen e kësaj të mërkurë.
Muajin e kaluar, parlamenti holandez votoi “pro” vendosjes së regjimit të vizave me Shqipërinë. Mocioni u kërkuar nga pesë parti parlamentare holandeze me argumentin se kriminaliteti shqiptar është rritur ndjeshëm. U miratua me 105 votat e ligjvënësve holandez nga 150 dhe kjo nuk i shkoi përshtat aspak Ramës. Ishte një zhvillim që pa diskutim tronditi qeverinë e tij e që vjen në një kohë kur Shqipëria pret një përgjigje për hapjen e negociatave me Bashkimin Europian.
Pas votimit në Holandë, në seancën e parë në parlamentin e braktisur nga opozita, para deputetëve të tij, e atyre të ashtuquajtur “opozita e re”, Rama u shfajësua duke e quajtur vendimin në parlamentit holandez, “lojë” të brendshme të politikës atje, për të garantuar votat e elektoratit të brendshëm. Votimi megjithatë ishte 105 pro dhe vetëm 49 kundër.
Kësaj linje i mëshuan më pas edhe deputetë të tjerë socialistë dhe mediat që i shërbejnë pushtetit të Ramës, mes tyre edhe Top Channel, me Drejtor të Përgjithshëm Ben Blushin.
Në edicionin qendror më 17 Prill të muajit të kaluar, kronika kryesore në edicionin qendror të lajmeve ishte e titulluar “Holanda është kthyer në një narko-shtet”. Sot, përmes emisionit të Dudushit në “prime time“, propaganda e Rilindjes kaploi sërish ekranin e Top Channel…
/Boldnews.al/
DENONCO