Ish-deputeti i Partisë Socialiste, Arben Malaj i është përgjigjur ftesës së Fatmir Mediut, që e cilësoi si kandidat potencial për ministër të qeverisë tranzitore.
Këtë hipotezë, ish ministri i Ekonomisë dhe i Financave e mohon duke e mbyllur me një “Mediu dhe unë jemi miq shumë të mirë”, edhe pse pastaj shton se “nuk merrem me supozime, në kohën e caktuar probabiliteti që të përgjigjem po ose jo është i barabartë”, sqaroi ai në emisionin ‘I ftuari’ në A2 CNN.
Veç Malajt, Mediu sugjeroi edhe Arta Daden, Ylli Bufin, Rexhep Mejdanin, Besnik Mustafaj, Rexhep Ukën dhe, Myqerem Tafajn si personazhe të përshtatshëm.
Opozita nuk pranon të marrë pjesë në zgjedhje pa krijimin e një qeverie tranzitore pa Ramën kryeministër dhe me ministra të pranuar nga të gjitha palët politike.
“Do arrihet fillimisht një marrëveshje që zgjedhjet vendore të shtyhen pak. Hapi i dytë do të jetë krijimi i një qeverie tranzitore, që nuk do të zgjasë deri në zgjedhjet e 2021, por deri në zgjedhjet e parakohshme dhe duket që palët kanë rënë dakord që kur të arrijnë marrëveshjen për zgjedhjet vendore të kenë caktuar edhe datën e ardhshme. Periudha nga zgjedhjet vendore tek ato parlamentare i jep kësaj qeverie tranzitore mandatin për një reforme politike”, nënvizon Malaj.
