Përgjimi i telefonave duket se mbetet mjeti më efikas i Prokurorisë për të zbuluar, identifikuar dhe arrestuar autorët e veprave penale.
Përgjatë vitit 2018, prokuroria ka përgjuar 4168 persona, duke shënuar rritje krahasuar me një vit më parë.
Në raportin vjetor të Prokurorisë së Përgjithshme, dorëzuar në Parlament, theksohet se në 715 procedime penale janë aplikuar metodat speciale të hetimit-përgjimi.
Në shifra të përgjithshme, gjatë vitit 2018 “janë ekzekutuar gjithsej 3063 vendime për përgjim të autorizuara nga gjykata në hetimet paraprake, aplikuar në lidhje me 715 procedime penale. Nga këto, 147 procedime penale kanë qenë në kuadër të hetimeve të prokurorisë për krime të rënda”, thuhet në raportin e Prokurorisë së Përgjithshme.
Në sajë të aplikimit të kësaj teknike hetimore-thekson Prokuroria e Përgjithshme- “është arritur në arrestimin/ndalimin e 619 personave të dyshuar për krime kundër personit, vepra penale në fushën e narkotikëve, korrupsion e shpërdorim detyre, trafiqe e kalim i paligjshëm i kufirit apo vepra të tjera të rënda, duke parandaluar kështu pasoja për shtetin e shtetasit. /Boldnews.al/
