Bindja Demokratike e drejtuar nga Astrit Patozi ka nisur zyrtarizimin e kandidatëve për kryebashkiakë për zgjedhjet vendore të 30 qershorit.
Pas regjistrimit në KQZ si pjesëmarrës në zgjedhje, Bindja arriti të kalojë edhe Kolegjin Zgjedhor, pas ankimit të bërë nga një prej partive, Bashkimi Demokratik, sipas të cilit regjistrimi i subjektit të krijuar nga Astrit Patozi ishte jashtë afateve, ka nisur edhe shpallja e kandidaturave.
Kështu në Durrës, Bindja do të kandidojë Igli carën, ish-deputet i PD-së. Në Vlorë kandidon me Valbona Mezinin, e cila ka drejtuar edhe një prej sekretariateve në PD, ndërsa në Korçë emri që do të përfaqësojë Bindjen është Leonard Olli, i cili është anëtar i këshillit bashkiak të Tiranës dhe për gati 3 vjet ka drejtuar grupin e këshilltarëve të PD-së në Bashkinë e Tiranës.
Olli është gjithashtu pjesë e bordit drejtues të Bindjes Demokratike.
Lista me emrat e kandidatëve do të bëhen publikë nga Astrit Patozi më 13 maj, e cila përkon me afatin e fundit regjistrimit të kandidatëve për 61 bashkitë e vendit.
Patozi ka deklaruar më parë se në bashkitë ku do të kandidojnë të pavarurit, Bindja do t’i mbështesë ata, dhe nuk do të paraqesë emrat e saj.
