Nuk ka hapje negociatash pa u dënuar ata që grabitën votat në 2017, pa u futur në burg politikanët e korruptuar dhe që u kapën në përgjime duke vjedhur votat.
Kështu u shpreh kreu demokrat, Lulzim Basha, nga Gjirokastra duke shtuar se nga Berlini, Edi Ramës, i kanë ardhur mesazhe të qarta.
“Me dhunën e krimit morën pushtetin, me kriminelët qeverisin, ndaj nuk iu bëhet vonë për shqiptarët, për ekonominë, për vogëlushët dhe prindërit e tyre”, tha Basha.
Ai hodhi akuza ndaj atyre që i cilësoi media kombëtare, që janë blerë me paratë që qeveria ua merr qytetarëve dhe dizinformojnë shqiptarët, duke gënjyer për të mbështetur qeverinë.
Europa, sipas Bashës, është armiku numër 1 i autokratëve dhe politikanëve të lidhur me krimin dhe atyre që vjedhin zgjedhjet.
“Shqipëria Europiane është makthi i Edi Ramës, i hajdutëve që e shoqërojnë. Ndaj dua t’i them tellallëve dhe haberxhinjve të Edi Ramës se në këtë betejë nuk jemi futur për karrige personale, apo për një rotacion politik, por n’a duhet një reformë e thellë, që fati i çdo politikani shqiptar të jetë e lidhur vetëm me votën e lirë të qytetarëve”, tha Basha.
Sipas tij, ky nuk është thjesht beteja për rotacionin politik, sepse ai është i pashmangshëm, por është beteja për të drejtat dhe vlerat evropiane, duke nisur me votën e lirë.
“Nuk ka Europë për vendet që skanë votën e lirë dhe që qeverisen nga krimi. Nuk ka Europë në një vend që nuk respekton kriteret minimale të shtetit të së drejtës. S’ka Europë në një vend ku qeveria është bërë njësh me krimin dhe u ka dhënë oligarkëve të gjithë buxhetin e shtetit, tenderat dhe gjithçka.
Sot në këtë ditë të Europës mesazhet kanë ardhur të qarta për qeverinë e paligjshme të Edi Ramës. Mesazhi se pa u dënuar politikanët që vodhën zgjedhjet e 2017, Shqipërisë nuk i hapen negociatat. Kjo është e vërteta, dhe jo pallavrat dhe propaganda e Edi Ramës, e cila buçet nga buritë e shpuara të televizioneve kombëtare të kapura nga paratë që u vidhen shqiptarëve.
Afërmendsh, sepse pa u ndëshkuar vjedhësit e votave, si mund të kemi zgjedhje të reja të lira e të ndershme. Beteja dhe zotimi ynë i parë është transformimi politik i vendit sipas standardeve evrpiane. Ne demokratët jemi të qartë e të vendosur. Në Evropë shkohet me zgjedhje të lira dhe me balancim pushteti e drejtësi të pavarur”, u shpreh Basha.
