Duke folur për sigurinë ushqimore në emisionin “Opinion”, ministri i Bujqësisë Bledi Çuçi ka renditur tre problemet më të mëdha të këtij sektori. Çuçi tha se problemet më të mëdha vijnë nga produktet shtazore.
“Problemi i parë është me strukturën që do ta rregullojmë, ka një mangësi në lidhje me laboratorët për të bërë të gjitha kontrollet në një kohë të përshtatshme dhe problemi që shfaqet më shumë ka të bëjë me produktet shtazore, me prejardhje shtazore, mishi dhe bulmeti sepse është shumë e shtrirë hapësira për të manipuluar sepse fillon që nga kullota që merr bagëtia, e cila mund të jetë e kontaminuar prej mbeturinave, që te therja, etj. deri në shitje”, tha Çuçi.
Ministri ka ftuar qytetarët të bëjnë sa më shumë denoncime reale, duke thënë se nuk ka vend për panik.
“Nuk ka vend për alarm dhe panik. Unë them që ka një përmirësim të ndjeshëm, nëse e ngremë pak alarmin nuk ka gjë të keqe, por pa shkuar te paniku. Strukturat përgjegjëse sot janë nën një situatë që nuk kanë qenë asnjëherë më mirë se kaq. Vetëm në 2018 kemi bërë rreth 60 mijë kontrolle, 1600 gjoba dhe janë çuar në kallëzim penal 92 subjekte.
Unë si ministër kam vërejtjet e mia, edhe për pjesën strukturore. Pjesa e kontrollit është më e strukturuar, sepse ushqimet hyjnë vetëm në disa pika doganore.
Prodhimi i brendshëm është shumë më i shtrirë dhe barra më e madhe i bie prodhuesit. Unë i ftoj qytetarët që të bëjnë sa më shumë denoncime reale”, ka thënë Çuçi./Opinion.al
