Pas humbjes me Kukësin dhe eliminimin nga Kupa e Shqipërisë, trajneri i korçarëve, Orges Shehi, ka fajësuar fatin e keq dhe mungesën e përqendrimit të lojtarëve.
Mungesa e fatit?
Ekuilibrat na u prishën që mbremë nga sëmundja e Vangjelit. Spostuam Muzakën në të djathtë, por dhe ai u dëmtua. Sidomos në ndeshje kupë, eksperienca luan një rol të madh. Pasi pësuam dy golat çdo gjë mbaroi.
Pas golit të Bregut, menduat për përmbysje?
Isha entuziast sepse në dhomat e zhveshjes i pashë me kokën e ulur të gjithë. I thashë: “Ngrëni kokën sepse futbolli është për burra. Mos mendoni për kualifikimin, por mendoni për lojën”.
Mënyra si pësoni golat?
Është e vërtetë ne i pësojmë golat nga moseksperienca. Kemi portier 21-vjeç dhe qëndërmbrojtës 18 vjeç. Janë djemë të rinj. Më vjen keq se prodhojnë shumë, kontrollojmë lojën, por në momente të caktuara diferencën e bëjnë kualitetet.
Bregu dhe Pervan me finte?
Është e drejtë gjën më të thjeshtë e bëjnë të vështirë dhe nga ajo ndëshkohemi. Unë jam një trajner profesionist, mundohem që të merrem vesh me lojtarët, pasi ndonjëherë duhet ngritur edhe zëri Jam pak i butë me lojtarët dhe nuk i “godas” edhe pse ndonjë herë duhet. Gjithsesi atyre duhet t’iu vijë keq për djersën e vet.
Besoni për Europën?
Na presin ndeshje të vështira, madje që në këtë të diel. Sigurisht që na presin ndeshje të vështira. Duhet të ngremë moralisht lojtarët. Skënderbeu është mësuar me trofe vit pas viti. Ndoshta lojtarët ngarkohen më shumë se ç’duhet. Po të marrim maksimumin në ato sfida çdo gjë është e mundur.
