Krizë artificiale e ka cilësuar kryeministri Edi Rama situatën politike në vend, ndërsa theksoi se askush nuk është i shqetësuar nga kjo situatë.
Në konferencën e përbashkët me shefen e diplomacisë europiane, Federica Mogherini, Rama shprehu bindjen se në 30 qershor do të bëhen zgjedhje në të 61 bashkitë e vendit.
“Askush nuk do të mund të pengojë procesin. Kush do të rrijë në sistem do të qëndrojë, kush do të dalë, le të dalë”, theksoi Rama, duke sjellë në vëmendje situatën politike në 2017 dhe marrëveshjen e arritur në atë kohë me kreun e opozitës Lulzim Basha.
Rama tha se ajo marrëveshje ishte maksimalja që mund të arrihej mes palëve, por nuk funksionoi. Kryeministri theksoi se mazhoranca dhe qeveria do t’i përmbahen vetëm rrugës së ligjit.
“Nuk ka asnjë lloj diskutimi se zgjedhjet do të mbahen më datë 30 qershor. Kjo gjë nuk mund të vihet në diskutim nga askush. Është e sigurt që në këtë datë ka zgjedhje dhe qytetarët do të votojnë.
Atë ditë do të kemi edhe zgjedhjen e 61 kryebashkiakëve të Shqipërisë. Se kush merr pjesë në zgjedhje e kush jo, këtë nuk e di. Gjithsecili është i lirë të hyjë ose jo në zgjedhje. Di që zgjedhjet janë legjitime dhe në të mund të marrë pjesë çdo parti politike legjitime. Më 30 qershor pra ka zgjedhje, kaq është e sigurt”, deklaroi Rama.
Lidhur me marrëveshjen e fshehtë Serbi-Kosovë, Rama tha se kjo është një gënjeshtër.
